امریکا نے قبضے میں لیے گئے ایرانی جہاز اور عملے کے 22 ارکان کو پاکستان کے حوالے کردیا، دفترِ خارجہ

امریکا نے قبضے میں لیے گئے ایرانی جہاز اور عملے کو پاکستان کے حوالے کردیا۔

دفترِ خارجہ (ایف او) نے آج جاری ہونے والی ایک پریس ریلیز میں بتایا کہ قبضے میں لیے گئے ایرانی بحری جہاز توسکا کے عملے کے 22 ارکان کو امریکہ کی جانب سے بحفاظت پاکستان پہنچا دیا گیا ہے۔

دفترِ خارجہ کے مطابق ان افراد کو گزشتہ رات بذریعہ ہوائی جہاز پاکستان لایا گیا تھا اور انہیں آج ہی ایرانی حکام کے حوالے کردیا جائے گا۔

بیان میں مزید کہا گیا کہ ایرانی بحری جہاز کو بھی ضروری مرمت کے بعد اس کے اصل مالکان کو واپس کرنے کے لیے پاکستانی سمندری حدود میں واپس لایا جا رہا ہے۔

پاکستان ایسے اعتماد سازی کے اقدامات کا خیر مقدم کرتا ہے اور علاقائی امن و سلامتی کیلئے جاری ثالثی کی کوششوں کے دوران بات چیت اور سفارت کاری میں سہولت کاری جاری رکھے گا۔

رائٹرز کے مطابق امریکی سینٹرل کمانڈ کا کہنا تھا کہ جہاز کا عملہ 6 گھنٹے تک بار بار دی جانے والی انتباہی وارننگز پر عمل کرنے میں ناکام رہا اور یہ جہاز امریکی ناکہ بندی کی خلاف ورزی کر رہا تھا۔

دریں اثنا وزیرِ خارجہ اور نائب وزیرِ اعظم اسحاق ڈار نے امریکہ اور ایران کے تعاون پر پاکستان کی جانب سے اظہارِ تشکر کیا اور کہا کہ ملک علاقائی امن و سلامتی کے لیے مذاکرات، سفارت کاری اور ثالثی میں سہولت کاری کے لیے پرعزم ہے۔