سروس لانگ مارچ ٹائرز 7.8 ارب روپے کے آئی پی او کے لیے تیار، بک بلڈنگ مئی میں ہو گی

سروس لانگ مارچ ٹائرز لمیٹڈ (ایس ایل ایم) نے پاکستان اسٹاک ایکسچینج سے منظوری حاصل کرنے کے بعد 7.8 ارب روپے جمع کرنے کے لیے اپنے ابتدائی عوامی حصص (آئی پی او) کے عمل کو آگے بڑھانے کا فیصلہ کیا ہے۔

ادارہ جاتی سرمایہ کاروں کے لیے بک بلڈنگ کا عمل مئی میں شروع ہوگا۔ کمپنی 389.7 ملین عام حصص پیش کر رہی ہے، جو آئی پی او کے بعد اس کے ادا شدہ سرمائے کا 5 فیصد بنتے ہیں۔ ان حصص کی کم از کم قیمت 14.25 روپے فی شیئر مقرر کی گئی ہے، جو سرمایہ کاروں کی دلچسپی کی بنیاد پر 19.95 روپے تک جا سکتی ہے۔

آئی پی او سے حاصل ہونے والی رقم کمپنی کے پیسنجر کار ریڈیل (پی سی آر) ٹائر بنانے کے توسیعی منصوبے میں استعمال کی جائے گی۔ کمپنی جنوری 2028 تک کاروں کے ٹائر بنانے کا ایک مخصوص پلانٹ لگانے کا ارادہ رکھتی ہے، جس کی ابتدائی پیداواری صلاحیت سالانہ 20 لاکھ ٹائر ہوگی، جسے 2030 تک بڑھا کر 30 لاکھ کر دیا جائے گا۔ سروس لانگ مارچ ٹائرز 2020 میں سروس انڈسٹریز لمیٹڈ چین کی چاؤیانگ لانگ مارچ ٹائر کمپنی اور مائیکو کارپوریشن پاکستان کے درمیان ایک مشترکہ منصوبے کے طور پر قائم کی گئی تھی۔

کمپنی کے سی ای او عمر سعید نے اس پیشکش کو کمپنی کی ترقی میں ایک اہم قدم قرار دیتے ہوئے کہا کہ اس سے پاکستان کی صنعتی ترقی اور برآمدات میں اضافہ ہوگا۔ عارف حبیب لمیٹڈ کے سی ای او شاہد علی حبیب کا کہنا تھا کہ یہ آئی پی او پاکستان کی ایکویٹی مارکیٹ پر بڑھتے ہوئے اعتماد کی عکاسی کرتا ہے، جہاں صنعتی اور برآمدی ادارے اب توسیع کے لیے کیپٹل مارکیٹ کا رخ کر رہے ہیں۔