پاکستانی ہوائی اڈوں پر ای گیٹس اور اسمارٹ اسکینرز کی تنصیب، ون ونڈو کلیئرنس کی جانب اہم قدم

پاکستان بھر کے ہوائی اڈوں پر مسافروں کی سہولت اور طریقہ کار کو سہل بنانے کے لیے ون ونڈو کلیئرنس سسٹم کے نفاذ کی جانب اہم پیش رفت ہوئی ہے۔

وفاقی وزیر داخلہ محسن نقوی کی زیر صدارت خصوصی اجلاس منعقد ہوا جس میں ایئرپورٹ سیکیورٹی کے عمل میں جدید ٹیکنالوجی کے استعمال اور انضمام کے حوالے سے حکمت عملی طے کی گئی۔ اس اہم اجلاس میں وزیر مملکت برائے داخلہ طلال چوہدری اور سیکریٹری دفاع لیفٹیننٹ جنرل (ر) محمد علی سمیت دیگر اعلیٰ حکام نے شرکت کی۔ اجلاس کے دوران ہوائی اڈوں پر سیکیورٹی اور کارکردگی کو بہتر بنانے کے لیے جدید مشینری کی تنصیب کا منصوبہ وضع کیا گیا۔

مشاورتی عمل کا بنیادی محورای گیٹس کی تنصیب ہے جو اسمارٹ اسکینرز سے لیس ہوں گے، تاکہ مسافروں کی کلیئرنس کے عمل کو تیز تر بنایا جا سکے۔ نئے منصوبے کے تحت تمام سیکیورٹی چیکس کو مشترکہ کاؤنٹرز پر یکجا کر دیا جائے گا جہاں ایک ہی اسکیننگ سسٹم کے ذریعے وقت کی بچت اور رش میں کمی ممکن ہو سکے گی۔ اس اقدام کا مقصد مسافروں کو محفوظ ماحول میں تیز رفتار اور موثر کلیئرنس فراہم کرنا ہے۔

وفاقی وزیر داخلہ محسن نقوی نے اس بات پر زور دیا کہ نظام کی ہموار اور بلا تعطل فراہمی کے لیے تمام متعلقہ اداروں کے درمیان ہم آہنگی ناگزیر ہے۔ ان کا کہنا تھا کہ باہمی اشتراک کے ذریعے ہم انتظار کے وقت اور رش کو کم کر کے مسافروں کے سفر کو خوشگوار بنا سکتے ہیں۔

اجلاس کے دوران وزارت دفاع کی جانب سے ہوائی اڈوں پر حفاظتی خدشات کا بھی احاطہ کیا گیا۔ سیکریٹری دفاع نے طیاروں اور مسافروں کے تحفظ کو یقینی بنانے کے لیے ایسی جدید مشینری کی درآمد پر روشنی ڈالی جو پرندوں سے ٹکرانے کے حادثات میں کمی لانے میں مددگار ثابت ہوگی۔