امریکہ ایران کشیدگی میں اضافہ، مشرق وسطیٰ کی مارکیٹس میں مندی

امریکہ اور ایران کے درمیان کشیدگی میں اضافے اور جنگ بندی کے غیر یقینی مستقبل کے باعث خلیجی ممالک کی اسٹاک مارکیٹس میں پیر کے روز کاروبار کے آغاز پر مندی دیکھی گئی۔ یہ خدشات اس وقت مزید بڑھ گئے جب امریکہ نے ایک ایرانی کارگو جہاز کو ضبط کر لیا، جبکہ آبنائے ہرمز میں بحری آمد و رفت بھی بڑی حد تک معطل رہی۔

ایرانی سرکاری میڈیا کے مطابق تہران نے امریکہ کے ساتھ نئے مذاکرات مسترد کر دیے ہیں اور جنگ بندی ختم ہونے سے قبل مجوزہ دوسرے دور میں شرکت نہیں کرے گا، جس سے خطے میں پائیدار امن کی امیدیں کمزور پڑ گئی ہیں۔

آٹھویں ہفتے میں داخل اس جنگ نے عالمی توانائی سپلائی کو شدید متاثر کیا ہے، جبکہ آبنائے ہرمز کی عملی بندش کے باعث تیل کی قیمتوں میں نمایاں اضافہ دیکھا جا رہا ہے۔

دبئی کا مرکزی شیئر انڈیکس 1.3 فیصد گر گیا، جس کی بڑی وجہ ایمار پراپرٹیز اور سالک کمپنی کے حصص میں کمی تھی، جبکہ ابو ظہبی کی مارکیٹ میں 0.3 فیصد کمی ریکارڈ کی گئی۔ قطر کا انڈیکس بھی 0.4 فیصد نیچے آیا۔

سعودی عرب کی مارکیٹ میں ملا جلا رجحان دیکھا گیا، جہاں الراجحی بینک کے حصص میں کمی آئی جبکہ سعودی آرامکو کے شیئرز میں معمولی اضافہ ہوا۔

دوسری جانب برینٹ کروڈ کی قیمت تقریباً 7 فیصد بڑھ کر 96.85 ڈالر فی بیرل ہو گئی، کیونکہ سرمایہ کار خطے کی صورتحال پر غیر یقینی کا شکار ہیں۔