شہباز شریف اور اردوان کا دیرپا علاقائی امن کے لیے ’سنہری موقع‘ سے بھرپور فائدہ اٹھانے پر زور

وزیراعظم شہباز شریف نے جمعہ کے روز ترکیہ کے صدر رجب طیب اردوان سے 5ویں انطالیہ ڈپلومیسی فورم کے موقع پر دوطرفہ ملاقات کی ہے۔ یہ بات وزیراعظم آفس سے جاری ایک بیان میں کہی گئی ہے۔

بیان میں کہا گیا ہے کہ ملاقات میں نائب وزیراعظم و وزیر خارجہ اسحاق ڈار، وزیر اطلاعات عطا اللہ تارڑ اور دونوں ممالک کے اعلیٰ حکام شریک تھے، جن میں ترکیہ کے وزیر خارجہ ہاکان فیدان بھی شامل تھے۔

خوشگوار ماحول میں ہونے والی گفتگو کے دوران صدر اردوان نے وزیراعظم شہباز شریف کا خیرمقدم کیا اور علاقائی امن کے لیے پاکستان کی سفارتی کوششوں کو سراہا۔

وزیراعظم نے ترکیہ کی میزبانی پر شکریہ ادا کیا اور فورم کے کامیاب انعقاد پر ترک صدر کو مبارکباد دیتے ہوئے اسے عالمی سطح پر اہم سفارتی پلیٹ فارم قرار دیا۔

اس سے قبل وزیراعظم شہباز شریف نے فورم کے موقع پر مختلف عالمی رہنماؤں سے غیر رسمی ملاقاتیں بھی کیں، جن میں قطر کے امیر شیخ تمیم بن حمد الثانی، قازقستان کے صدر قاسم جومارت توکایوف، آذربائیجان کے صدر الہام علییف اور شام کے صدر احمد الشرع شامل تھے۔ انہوں نے قطر کے وزیراعظم و وزیر خارجہ شیخ محمد بن عبدالرحمن الثانی اور کوسوو کی سابق صدر ویوسا عثمانی سے بھی ملاقات کی۔

یہ تبادلۂ خیال خوشگوار اور تعمیری ماحول میں ہوا، جس میں عالمی اور علاقائی پیش رفت زیرِ بحث آئی، اور پاکستان کو ایک اہم رابطہ کار کے طور پر پیش کیا گیا۔

صدر اردوان کے ساتھ دوطرفہ ملاقات میں وزیراعظم نے مشرقِ وسطیٰ میں جنگ بندی کے معاہدوں میں توسیع اور امن مذاکرات کی بحالی کے لیے پاکستان کی کوششوں سے آگاہ کیا۔ دونوں رہنماؤں نے اس امر پر زور دیا کہ موجودہ ’موقع کی کھڑکی‘ سے مؤثر انداز میں فائدہ اٹھاتے ہوئے دیرپا اور پائیدار علاقائی امن کو آگے بڑھایا جائے۔

پاکستان اور ترکیہ کے درمیان گہرے، تاریخی اور برادرانہ تعلقات کا اعادہ کرتے ہوئے رہنماؤں نے دوطرفہ تعلقات کی مثبت سمت پر اطمینان کا اظہار کیا۔

دونوں ممالک نے اس سال کے اواخر میں انقرہ میں اعلیٰ سطحی اسٹریٹجک تعاون کونسل ( ایچ ایل ایس سی سی) کا آٹھواں اجلاس منعقد کرنے پر اتفاق کیا، جبکہ جاری اقدامات کو تیز کرنے اور اقتصادی تعاون کے نئے مواقع تلاش کرنے کی ضرورت پر بھی زور دیا۔

وزیراعظم شہباز شریف نے صدر اردوان اور قطر کے امیر شیخ تمیم بن حمد الثانی کے ساتھ سہ فریقی ملاقات میں بھی شرکت کی۔

تینوں رہنماؤں نے حالیہ علاقائی پیش رفت اور جاری امن کوششوں پر تبادلہ خیال کیا، جن میں غزہ اور فلسطین کی تشویشناک صورتحال بھی شامل تھی، اور اس بات پر اتفاق کیا کہ دیرپا علاقائی امن و استحکام کے لیے مکالمے اور سفارت کاری کو آگے بڑھانے کی خاطر قریبی تعاون جاری رکھا جائے گا۔