بڑھتے ڈیزل نرخ ، پنجاب منیں کسانوں کے لیے 1500 روپے فی ایکڑ ریلیف

پنجاب کے وزیر زراعت سید عاشق حسین کرمانی نے اس عزم کا اعادہ کیا ہے کہ ایران جنگ کے تناظر میں ڈیزل کی قیمتوں میں اضافے کے پیش نظر حکومت گندم کے کاشتکاروں کو 1500 روپے فی ایکڑ مالی امداد فراہم کر رہی ہے۔

انہوں نے بتایا کہ وزیر اعلیٰ پنجاب اس امداد کی شفاف اور بروقت ترسیل کی خود نگرانی کریں گی۔

وزیر زراعت نے فیلڈ فارمیشنز کے ہنگامی اجلاس کی صدارت کرتے ہوئے متعلقہ حکام کو ہدایت کی کہ وہ سروس فراہم کرنے والوں سے رابطہ کریں، تاکہ گندم کی کٹائی کے نرخوں میں جلد از جلد کمی لائی جا سکے۔ انہوں نے فیلڈ افسران کو یہ بھی ہدایت دی کہ وہ کاشتکاروں کے ساتھ مسلسل رابطے میں رہیں، تاکہ انہیں کٹائی کے عمل کے دوران کسی قسم کی دشواری کا سامنا نہ کرنا پڑے۔

اجلاس میں سیکرٹری زراعت پنجاب افتخار علی سہو سمیت دیگر اعلیٰ حکام نے شرکت کی، جہاں زرعی شعبے کو درپیش چیلنجز اور کسانوں کو ریلیف فراہم کرنے کے اقدامات کا تفصیلی جائزہ لیا گیا۔