برآمدی شعبے کے تحفظ کیلئے حکومت کے ساتھ مشاورت ناگزیر ہے، ایف پی سی سی آئی
- بڑھتے اخراجات سے عالمی منڈی میں ملکی مسابقت متاثر، صنعتوں کی بندش اور بے روزگاری کا خطرہ پیدا ہو گیا، عاطف اکرم شیخ
فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے صدر عاطف اکرام شیخ نے برآمدی شعبوں کے لیے فوری حفاظتی اقدامات (سیفٹی نیٹ) کا مطالبہ کرتے ہوئے خبردار کیا ہے کہ ہائی اسپیڈ ڈیزل کی قیمت اور بڑھتے ہوئے اخراجات عالمی منڈی میں پاکستان کی مسابقت کو متاثر کر رہے ہیں۔
اگرچہ انہوں نے پیٹرول کی قیمت میں کمی کا خیرمقدم کیا، لیکن اسے ناکافی قرار دیتے ہوئے کہا کہ 520 روپے فی لیٹر کی سطح پر موجود ڈیزل مال برداری اور پیداواری لاجسٹکس کو مہنگا کر رہا ہے، جس سے صنعتوں کی بندش اور بے روزگاری کا خطرہ پیدا ہو گیا ہے۔
نائب صدر ثاقب فیاض مگوں نے واضح کیا کہ بھارت اور بنگلہ دیش جیسے علاقائی حریفوں کے مقابلے میں پاکستانی برآمد کنندگان کو ایندھن کی زیادہ قیمتوں کی وجہ سے نقصان اٹھانا پڑ رہا ہے۔
انہوں نے مطالبہ کیا کہ برآمدی صنعتوں کے لیے پیٹرولیم ڈویلپمنٹ لیوی کو مکمل طور پر معطل کیا جائے اور متبادل توانائی کی طرف منتقلی کو تیز کیا جائے۔
ایف پی سی سی آئی کی قیادت نے حکومت پر زور دیا کہ برآمدی شعبے کا تحفظ محض صنعتی ضرورت نہیں بلکہ قومی معاشی سلامتی کا معاملہ ہے، جس کے لیے وزارت خزانہ اور تجارت کے ساتھ فوری مشاورت ضروری ہے۔
Comments