ورلڈ کپ اسکواڈ میں فیل فوڈن کی جگہ یقینی نہیں، ٹامس ٹوچل

مانچسٹر سٹی کے مڈفیلڈر فل فوڈن کی انگلینڈ کے 2026 ورلڈ کپ اسکواڈ میں جگہ یقینی نہیں ہے۔ یہ بات منیجر تھامس ٹوچل نے کہی ہے۔

25 سالہ فوڈن 49 انٹرنیشنل میچز کھیل چکے ہیں لیکن وہ ان دنوں فارم میں نہیں ہیں اور اپنے کلب کی جانب سے گزشتہ 15 میں سے صرف 4 میچز میں الیون کا حصہ بن سکے ہیں۔ انہوں نے پریمیئر لیگ میں اپنا آخری گول 14 دسمبر کو کیا تھا۔

منگل کو ویمبلے اسٹیڈیم میں جاپان کے خلاف انگلینڈ کی 1-0 سے شکست کے دوران دوسرے ہاف میں فوڈن کو گراؤنڈ سے باہر بلانے کے بعد تھامس ٹوچل نے کہا کہ یہ کوئی ضمانت نہیں ہے کہ وہ ورلڈ کپ اسکواڈ میں شامل ہوں گے۔

جرمن کوچ نے مزید کہا کہ ظاہر ہے کہ مانچسٹر سٹی کی جانب سے انہیں حال ہی میں زیادہ وقت نہیں ملا، اس کے باوجود وہ انتہائی پرجوش انداز میں ٹریننگ کیمپ میں آئے اور مشقوں کے دوران بہت اچھے رہے۔ میرا خیال تھا کہ وہ ہمیں حیران کر دیں گے اور اسی ولولے اور جوش کے ساتھ کھیلیں گے لیکن وہ میچ پر اپنا اثر چھوڑنے کے لیے جدوجہد کرتے نظر آ رہے ہیں۔

کپتان اور اسٹرائیکر ہیری کین کی انجری کے باعث 2024 کے بہترین پریمیئر لیگ پلیئر قرار دیے جانے والے فوڈن کو ویمبلے میں مرکزی کردار دیا گیا تھا، تاہم وہ فالس نائن کے طور پر غیر متاثر کن رہے اور انگلینڈ کے اسٹارٹنگ الیون میں سب سے کم گیند ان کے پاس آئی۔

ٹیم کی کارکردگی پر بات کرتے ہوئے تھامس ٹوچل نے کہا کہ جب ہم اٹیکنگ کھلاڑیوں کو میدان میں اتارتے ہیں تو ہم ان سے جارحانہ کھیل، تخلیقی صلاحیتوں، ڈرِبلنگ، شاٹس اور اسسٹس کی توقع کرتے ہیں لیکن ہمیں واضح طور پر یہ سب مطلوبہ مقدار میں نہیں مل سکا۔

انگلش منیجر کو مئی کے آخر تک امریکہ، کینیڈا اور میکسیکو میں ہونے والے ٹورنامنٹ کے لیے اپنے اسکواڈ کی فہرست جمع کرانی ہے۔