شمالی علاقوں میں بارش، برف باری اور تودے گرنے کا خطرہ ہے، این ڈی ایم اے کی وارننگ

نیشنل ڈیزاسٹر مینجمنٹ اتھارٹی (این ڈی ایم اے) نے جمعہ کو ملک کے شمالی حصوں میں 14 سے 16 مارچ تک بارش، گرج چمک اور برف باری کی پیش گوئی کرتے ہوئے پہاڑی علاقوں میں گلیشیائی جھیلیں پھٹنے اور لینڈ سلائیڈنگ کے ممکنہ خطرات سے خبردار کیا ہے۔

این ڈی ایم اے کے مطابق نیشنل ایمرجنسی آپریشن سنٹر(این ای او سی) نے تازہ ترین موسمیاتی جائزوں کے بعد الرٹ جاری کیا ہے، جس کے تحت گلگت بلتستان کے علاقوں گلگت، استور، دیامر، اسکردو، ہنزہ، غذر اور شگر، جبکہ آزاد کشمیر کے علاقوں مظفرآباد، باغ، پونچھ، حویلی، کوٹلی، بھمبر اور وادی نیلم میں بارش اور برف باری کا امکان ہے۔ خیبر پختونخوا کے اضلاع چترال، دیر، سوات، کالام اور بٹگرام میں بھی اسی طرح کے موسمی حالات متوقع ہیں۔

ادارے نے متنبہ کیا ہے کہ پہاڑی علاقوں میں برف باری اور بارش سے سڑکوں پر پھسلن، حدِ نگاہ میں کمی اور برفانی تودے گرنے کے واقعات ہو سکتے ہیں، جس سے آمد و رفت میں رکاوٹ اور بجلی کی فراہمی معطل ہونے کا خدشہ ہے۔

مزید برآں بارش اور بڑھتے ہوئے درجہ حرارت کے امتزاج سے گلیشیئرز پگھلنے کا عمل تیز ہو سکتا ہے، جس کے نتیجے میں چترال، سوات، کوہستان اور گلگت بلتستان کے مختلف علاقوں میں اچانک سیلابی صورتحال پیدا ہو سکتی ہے۔

شاہراہِ قراقرم اور اس سے ملحقہ راستوں پر بھی لینڈ سلائیڈنگ کے خطرات موجود ہیں۔ این ڈی ایم اے نے سیاحوں اور مسافروں کو متاثرہ علاقوں میں غیر ضروری سفر سے گریز کرنے کی ہدایت کی ہے اور مقامی انتظامیہ کو الرٹ رہنے کا حکم دیا ہے۔ عوام کو تازہ ترین معلومات کے لیے پاک این ڈی ایم اے ڈیزاسٹرالرٹ ایپ استعمال کرنے کا مشورہ دیا گیا ہے۔