حیدرآباد کنگز مین نے پی ایس ایل 11 میں گلین میکسویل کی دستیابی کے حوالے سے نئی تفصیلات شیئر کر دیں

آسٹریلوی آل راؤنڈر گلین میکسویل نے کنگز مین انٹرپرائز کے ساتھ کثیر سالہ معاہدہ کر لیا ہے اور وہ پاکستان سپر لیگ (پی ایس ایل) کے 11ویں ایڈیشن میں حیدرآباد کنگز مین کی نمائندگی کریں گے۔ فرنچائز حکام کے مطابق میکسویل کا یہ معاہدہ صرف پی ایس ایل تک محدود نہیں بلکہ اس کے بعد بھی برقرار رہے گا۔

حیدرآباد کنگز مین کی آپریشنز ڈائریکٹر اقرا فاروقی نے ایک شو میں تصدیق کی کہ میکسویل ریٹائرمنٹ کے بعد بھی کنگز مین کا حصہ رہیں گے۔ انہوں نے بتایا کہ میکسویل فرنچائز کے مالی حالات سے واقف تھے اور دستیاب سیلری کیپ پر کھیلنے کے لیے تیار ہو گئے۔

پی ایس ایل 11 کے آغاز میں میکسویل پہلے تین سے چار میچوں کے لیے مارنس لبوشین کی جگہ لیں گے، تاہم ضرورت پڑنے پر وہ پورا سیزن بھی کھیل سکتے ہیں۔

یاد رہے کہ میکسویل نے حال ہی میں آئی پی ایل سے دستبردار ہو کر پی ایس ایل میں شرکت کا فیصلہ کیا تھا۔ اس موقع پر میکسویل کا کہنا تھا کہ پاکستان سے ہمیشہ بہت پیار ملا ہے اور حیدرآباد کی نمائندگی کرنا میرے لیے اعزاز کی بات ہے۔حیدرآباد کنگز مین کو امید ہے کہ میکسویل کا تجربہ اور جارحانہ بیٹنگ ٹیم کے لیے گیم چینجر ثابت ہوگی۔