امریکی ڈالر کے مقابلے میں روپیہ مزید تگڑا

انٹربینک مارکیٹ میں منگل کو بھی ڈالر کے مقابلے روپے کی قدر میں بہتری کا سلسلہ جاری رہا۔

کاروبار کے اختتام پر ڈالر کے مقابلے میں روپیہ 3 پیسے کی بہتری سے 279.52 پر بند ہوا۔

یاد رہے کہ پیر کو مقامی کرنسی 279.55 روپے پر بند ہوئی تھی۔

دوسری جانب منگل کو ین کی قدر میں کمی دیکھی گئی کیونکہ مارکیٹیں امریکی صدر ڈونلڈ ٹرمپ کے محصولات کے نظام پر پیدا ہونے والی نئی ہلچل کے عالمی تجارت پر اثرات کا جائزہ لے رہی ہیں۔

ڈالر انڈیکس 0.2 فیصد اضافے کے ساتھ 97.90 پر پہنچ گیا۔

یورو کی قدر 0.14 فیصد گر کر 1.1768 ڈالر پر آگئی جبکہ ین ڈالر کے مقابلے میں 0.4 فیصد گر کر 155.27 کی سطح پر آگیا۔

برطانوی پاؤنڈ (اسٹرلنگ) بھی 0.08 فیصد کمی کے ساتھ 1.3478 ڈالر پر بند ہوا۔

امریکی ڈالر نے اپنے نقصانات پر قابو پا لیا کیونکہ تعطیلات کے بعد چین اور جاپان کی مارکیٹیں دوبارہ کھل گئیں اور صدر ٹرمپ نے سپریم کورٹ کی جانب سے ان کے ہنگامی ٹیرف (محصولات) کو کالعدم قرار دیے جانے کے بعد ممالک کو حالیہ تجارتی معاہدوں سے پیچھے ہٹنے کے خلاف متنبہ کیا۔

چین کی جانب سے جاپانی کمپنیوں پر برآمدی کنٹرول کے اعلان کے بعد جو دونوں ممالک کے درمیان خراب ہوتے تعلقات کی ایک اور علامت ہے ین کی قدر میں کمی ریکارڈ کی گئی۔