پاکستان میں ٹیلنٹ کی کمی نہیں مگر اے آئی کی دوڑ جیتنے کے لیے پختہ ارادے کی ضرورت ہے، سی ای او ڈیوسنک

ڈیوسنک کے گلوبل سی ای او عثمان آصف کا کہنا ہے کہ پاکستان عالمی آئی ٹی مارکیٹ بالخصوص جی سی سی اور شمالی امریکہ میں ترقی کے لیے بہترین پوزیشن میں ہے۔ سال 2026 تک عالمی آئی ٹی مارکیٹ کے 6 ٹریلین ڈالر سے تجاوز کرنے کی توقع ہے، جبکہ صرف آرٹیفیشل انٹیلیجنس (اے آئی) سالانہ 4.4 ٹریلین ڈالر کا اضافہ کر سکتی ہے، جس سے پاکستان ادارہ جاتی تعاون کے ذریعے فائدہ اٹھا سکتا ہے۔

اسلام آباد میں انڈس اے آئی ویک سے خطاب کرتے ہوئے انہوں نے کہا کہ پاکستان سالانہ 3 لاکھ آئی ٹی پروفیشنلز پیدا کر رہا ہے، لیکن 2030 تک 15 ارب ڈالر کی برآمدات کا ہدف حاصل کرنے کے لیے خواتین کی شرکت (جو ابھی صرف 20 فیصد ہے)، فائبر آپٹک انفرااسٹرکچر اور دیہی نوجوانوں کی تربیت پر ہنگامی توجہ دینا ہوگی۔

انہوں نے خواتین کی کم شمولیتی شرح کو معاشی بدانتظامی قرار دیا۔

عثمان آصف نے بتایا کہ پاکستان کی آئی ٹی برآمدات میں مسلسل 18 ماہ سے اضافہ ہو رہا ہے اور مالی سال 26-2025 کے پہلے چھ ماہ میں ہی 2.24 ارب ڈالر کمائے جا چکے ہیں۔ اس موقع پر وفاقی وزیر آئی ٹی شزا فاطمہ خواجہ نے ڈیوسنک کی خدمات کے اعتراف میں انہیں ایوارڈ سے بھی نوازا۔

کاپی رائٹ بزنس ریکارڈر 2026