وزیراعظم دو روزہ سرکاری دورے پر آسٹریا روانہ

وزیراعظم شہباز شریف کے دفتر سے جاری بیان کے مطابق وہ آسٹریا کے وفاقی چانسلر کرسچن اسٹاکر کی دعوت پر دو روزہ سرکاری دورے پر ویانا روانہ ہو گئے ہیں۔ ان کے ہمراہ وفاقی کابینہ کے ارکان اور سینئر حکام پر مشتمل اعلیٰ سطح کا وفد بھی موجود ہے۔

دورے کے دوران وزیراعظم وفاقی چانسلر کے ساتھ دوطرفہ اور وفد کی سطح پر مذاکرات کریں گے، جس میں باہمی تعلقات کے تمام پہلوؤں پر تبادلہ خیال کیا جائے گا۔

شہباز شریف اور آسٹریا کے چانسلر دونوں ممالک کے درمیان سرمایہ کاری بڑھانے کے لیے معروف کاروباری شخصیات کے ایک اجلاس کی مشترکہ صدارت بھی کریں گے۔ اس کے علاوہ وہ پاک-آسٹریا بزنس فورم کے اجلاس کی صدارت کریں گے اور اقوام متحدہ کی ایک تقریب بعنوان ”پائیدار ترقی: عالمی امن اور خوشحالی کا راستہ ”سے خطاب کریں گے۔

وزیراعظم کی بین الاقوامی ایٹمی توانائی ایجنسی (آئی اے ای اے) کے ڈائریکٹر جنرل سے بھی ملاقات طے ہے۔ پاکستان اور آسٹریا کے درمیان مکالمے، تعاون اور بین الاقوامی قانون کے احترام کی مشترکہ اقدار پر مبنی خوشگوار اور دوستانہ تعلقات قائم ہیں۔ یہ دورہ دونوں ممالک کے درمیان سفارتی تعلقات کے قیام کے 70 سال مکمل ہونے کی مناسبت سے کیا جا رہا ہے، جس سے دوطرفہ تعلقات کو نئی جہتیں ملیں گی۔