38 ارب کے رمضان ریلیف پیکیج کا اجرا، ہر مستحق خاندان کو 13 ہزار روپے دیے جائیں گے

وزیراعظم شہباز شریف نے ہفتے کو 38 ارب روپے کے رمضان ریلیف پیکیج 2026 کا اجرا کردیا جس کے تحت ملک بھر کے 1.21 کروڑ (12.1 ملین) خاندانوں کو مالی امداد فراہم کی جائے گی۔

اس پروگرام کے تحت ماہِ رمضان کے دوران ہر مستحق خاندان کو 13 ہزار روپے دیئے جائیں گے۔

تقریب سے خطاب کرتے ہوئے وزیراعظم شہباز شریف نے کہا کہ اس پروگرام کی تیاری کے دوران حکومت کو کئی چیلنجز کا سامنا کرنا پڑا جن میں بینکوں کی آمادگی، پاکستان میں ڈیجیٹل انفرااسٹرکچر کی کمی اور اسٹیٹ بینک سے وابستہ رکاوٹیں شامل تھیں۔

وزیراعظم شہباز شریف نے کہا کہ اس مقصد کے لیے رواں سال 38 ارب روپے مختص کیے گئے ہیں۔

انہوں نے مزید کہا کہ یہ رقم نہ صرف چاروں صوبوں کے مستحق افراد میں تقسیم کی جائے گی بلکہ گلگت بلتستان اور آزاد کشمیر میں بھی ڈیجیٹل والٹس اور بینک اکاؤنٹس کے ذریعے پہنچائی جائے گی۔ وظیفے کی رقم بڑھا کر 10 ارب روپے کر دی گئی ہے۔

انہوں نے اس بات پر زور دیا کہ وفاقی سطح پر حجم اور درپیش چیلنجز کے اعتبار سے ماہِ رمضان کے دوران کی جانے والی یہ اب تک کی سب سے بڑی کوشش ہے۔

وزیراعظم نے کہا کہ میں وقتاً فوقتاً جائزہ لیتا رہوں گا تاکہ اس بات کو یقینی بنایا جا سکے کہ یہ 38 ارب روپے شفاف اور درست طریقے سے تقسیم کیے جائیں۔

انہوں نے مزید کہا کہ میں اپنے بین الاقوامی شراکت داروں کا بھی ان کے گراں قدر تعاون، دلچسپی اور ہمدردی پر شکریہ ادا کرنا چاہوں گا۔ ہم سب مل کر اسی ماہ اس سنگِ میل کو عبور کر لیں گے۔