وزیراعظم کا پنکھا تبدیلی پروگرام کا آغاز

حکومت نے ملک بھر میں توانائی کی بچت کے لیے وزیراعظم پنکھا تبدیلی پروگرام کا باقاعدہ آغاز کر دیا، جس کے تحت 10 کروڑ پرانے پنکھوں کو بجلی بچانے والے جدید ماڈلز سے تبدیل کیا جائے گا۔ وفاقی وزیر توانائی اویس لغاری نے اسے ایک تکلیف دہ مگر ضروری اصلاحاتی ایجنڈا قرار دیتے ہوئے بجلی کے شعبے میں قرضوں کی ری اسٹرکچرنگ کا اشارہ بھی دیا ہے۔ انہوں نے واضح کیا کہ سیاسی قیمت کی پروا کیے بغیر ڈھانچہ جاتی تبدیلیاں نافذ کی جائیں گی۔

وزیر توانائی کے مطابق بجلی کی طلب میں کمی کی ایک وجہ تیزی سے بڑھتی ہوئی سولرائزیشن ہے، جس سے نیشنل گرڈ کے لیے آپریشنل چیلنجز پیدا ہو رہے ہیں۔ انہوں نے بتایا کہ گزشتہ دو سال میں بجلی نرخوں اور صنعتی ٹیرف میں خاطر خواہ کمی کی گئی ہے۔ اس پروگرام کے تحت صارفین آسان شرائط پر پنکھے بدل سکیں گے اور پرانے پنکھے کی واپسی کی لازمی شرط بھی ختم کر دی گئی ہے۔

وزیر موسمیاتی تبدیلی مصدق ملک نے اس اقدام کو غریب دوست قرار دیتے ہوئے کہا کہ ایک پنکھے کی تبدیلی سے صارف سالانہ 12 ہزار روپے تک بچا سکے گا۔ انہوں نے اسے ماحولیاتی تحفظ کے لیے بھی اہم قرار دیا، کیونکہ پاکستان موسمیاتی آفات سے جی ڈی پی کے تقریباً 10 فیصد کے برابر نقصان اٹھا چکا ہے۔

وفاقی وزیر خزانہ محمد اورنگزیب نے بھی اس منصوبے کو مالی استحکام اور توانائی کے تحفظ کے لیے ناگزیر قرار دیتے ہوئے اپنی مکمل حمایت کا یقین دلایا ہے۔