پاک سوزوکی کا سنگ میل : ایکسٹار انجن آئل کی پہلی کھیپ عمان برآمد

پاک سوزوکی موٹر کمپنی (پی ایس ایم سی) نے کامیابی کے ساتھ ایکسٹار انجن آئل کی پہلی کھیپ عمان برآمد کر دی ہے، جس کے ساتھ ہی وہ یہ سنگ میل عبور کرنے والی پاکستان کی پہلی اوریجنل ایکویپمنٹ مینوفیکچرر(اوای ایم) بن گئی ہے۔

پاک سوزوکی کے اعلامیے کے مطابق ایکسٹار عالمی سطح پر قابل بھروسہ برانڈ ہے جو گاڑیوں، موٹر سائیکلوں اور آؤٹ بورڈ انجنوں کے لیے اپنی اعلیٰ کارکردگی کی وجہ سے مشہور ہے۔ پاک سوزوکی پہلے ہی ویتنام کو پرزہ جات جبکہ یورپ اور جاپان کو اسیسریز برآمد کر رہی ہے۔

عمان بھیجی جانے والی یہ کھیپ مشرق وسطیٰ کو چکنا کرنے والے مادوں کی پہلی برآمد ہے، جو کمپنی کی مزید بین الاقوامی ترقی کے عزائم کو ظاہر کرتی ہے۔

اس سلسلے میں منعقدہ تقریب میں پاک سوزوکی کے مینیجنگ ڈائریکٹر ہیروشی کاوامورا اور ایڈیمٹسو لیوب پاکستان کے صدر و سی ای او ٹوموہیرو یاماشیتا نے اپنی ٹیموں کے ہمراہ شرکت کی۔ تقریب سے خطاب کرتے ہوئے مینیجنگ ڈائریکٹر پاک سوزوکی نے کمپنی کی 1983 سے وابستہ تاریخ پر روشنی ڈالی۔

انہوں نے بتایا کہ پاک سوزوکی نے 1997 میں نیپال اور بنگلہ دیش کو گاڑیوں کی برآمد شروع کی تھی اور آج کمپنی نے عمان کو ’ایکسٹار‘ انجن آئل برآمد کر کے ایک اور اہم سنگ میل حاصل کر لیا ہے، جسے انتہائی حوصلہ افزا قرار دیا جا رہا ہے۔ کمپنی کی یہ برآمدی سرگرمیاں حکومت پاکستان کے برآمدات کے فروغ کے اہداف میں معاون ثابت ہو رہی ہیں۔

مزید برآں ایڈیمٹسو لیوب پاکستان کے صدر و سی ای او ٹوموہیرو یاماشیتا نے اس کامیابی پر پاک سوزوکی کا شکریہ ادا کیا اور پوری ٹیم کی کوششوں کو سراہا۔