اسلام آباد خودکش دھماکے کا ماسٹر مائنڈ گرفتار کر لیا، محسن نقوی

وفاقی وزیرِ داخلہ محسن نقوی نے ہفتے کے روز کہا ہے کہ قانون نافذ کرنے والے اداروں (ایل ای ایز) نے اسلام آباد کی امام بارگاہ میں کئے گئے خودکش دھماکے کے تمام سہولت کاروں اور ملزمان کے ساتھ ماسٹر مائنڈ کو بھی گرفتار کر لیا ہے۔

جمعے کے روز اسلام آباد کے علاقے ترلائی میں ایک امام بارگاہ میں دھماکے کے نتیجے میں کم از کم 31 افراد جاں بحق جبکہ درجنوں زخمی ہو گئے تھے۔

اسلام آباد میں میڈیا سے گفتگو کرتے ہوئے محسن نقوی نے بتایا کہ کاؤنٹر ٹیررازم ڈیپارٹمنٹ خیبر پختونخوا اور دیگر اداروں کے تعاون سے پشاور اور نوشہرہ میں چھاپے مارے گئے۔ یہ بات سرکاری خبر رساں ادارے ریڈیو پاکستان نے ایک رپورٹ میں کہی ہے۔

وفاقی وزیرِ داخلہ نے کہا کہ اس حملے کا ماسٹر مائنڈ افغان شہری ہے اور وہ حکام کی تحویل میں ہے۔ انہوں نے کہا کہ حملے کی مکمل منصوبہ بندی اور تربیت افغانستان میں داعش کی جانب سے دی گئی۔

انہوں نے کہا کہ ’’اب اس بات میں رتی برابر بھی شک نہیں رہا کہ افغانستان دہشت گرد تنظیموں کی نرسری ہے۔‘‘

محسن نقوی نے مزید کہا کہ چاہے ٹی ٹی پی ہو، طالبان ہوں، داعش ہو یا کوئی اور گروہ، سب افغان سرزمین سے بھارت کی مالی معاونت سے سرگرم ہیں۔
انہوں نے دعویٰ کیا کہ ’’بھارت نے گزشتہ سال مئی کے بعد اس فنڈنگ کے بجٹ میں اضافہ کیا ہے۔‘‘

وزیر داخلہ نے کہا کہ معرکۂ حق میں پاکستان کے ہاتھوں ذلت آمیز شکست کے بعد بھارت نے ان دہشت گرد گروہوں کے ذریعے پاکستان کے خلاف خفیہ جنگ شروع کی۔

انہوں نے کہا کہ ’’ہم اس حوالے سے تمام تفصیلات اور پیش رفت اپنی بیرونِ ملک سفارتی مشنز کے ذریعے دنیا کے سامنے رکھیں گے۔‘‘

وفاقی وزیر نے مزید کہا ہے کہ ’’دہشت گردی کے خلاف ہمارا عزم مضبوط، واضح اور غیر مبہم ہے۔ دہشت گرد تنظیموں کو کسی بھی صورت میں الگ الگ خانوں میں تقسیم نہیں کیا جا سکتا اور نہ ہی کسی کے ساتھ کسی قسم کی نرمی برتی جا سکتی ہے۔‘‘