پنجاب فوڈ اتھارٹی (پی ایف اے) نے حج پر روانگی سے قبل عازمینِ حج کو خوراک سے متعلق رہنمائی اور صحت کے بارے میں آگاہی فراہم کرنے کیلئے صوبہ بھر میں نیوٹریشن آگاہی کیمپ کا انعقاد کیا۔
وزیراعلیٰ پنجاب کی معاونِ خصوصی سلمیٰ بٹ نے ڈی جی پنجاب فوڈ اتھارٹی عاصم جاوید کے ہمراہ پنجاب یونیورسٹی میں قائم حج ٹریننگ کیمپ کا دورہ کیا۔ انہوں نے شرکاء سے خطاب کرتے ہوئے حج کی ادائیگی کے دوران اچھی صحت برقرار رکھنے کی اہمیت پر زور دیا۔
تمام اضلاع کے حج تربیتی مراکز میں نیوٹریشن کے سیشنز کو لازمی قرار دے دیا گیا۔ سلمیٰ بٹ نے تمام عازمین کو مبارکباد دی اور ان کے حج کی قبولیت کیلئے دعا کی۔ انہوں نے عازمین سے زور دے کر کہا کہ وہ اپنے سفرِ کے دوران پاکستان کی سالمیت، خوشحالی اور پاک فوج کی خیر و عافیت کیلئے خصوصی دعائیں کریں۔ انہوں نے مزید کہا کہ یہ کیمپ پنجاب فوڈ اتھارٹی کی جانب سے عازمین کی سہولت اور ان کی غذائی ضروریات کو پورا کرنے کے حوالے سے شعور بیدار کرنے کیلئے لگائے گئے ہیں۔
ڈی جی نے کہا کہ پنجاب فوڈ اتھارٹی کی حج نیوٹریشن گائیڈ عازمینِ حج کو اچھی صحت برقرار رکھنے میں مدد دینے کیلئے ایک منفرد اور قابلِ ستائش اقدام ہے۔ لاہور، قصور، شیخوپورہ، ننکانہ صاحب، فیصل آباد، جھنگ، چنیوٹ اور ٹوبہ ٹیک سنگھ میں آگاہی سیشنز منعقد کیے جارہے ہیں جبکہ اوکاڑہ، ساہیوال، پاکپتن، گوجرانوالہ، گجرات، منڈی بہاؤالدین، حافظ آباد، سیالکوٹ، نارووال اور سرگودھا میں اضافی کیمپ قائم کیے گئے ہیں۔
دوسری جانب پنجاب فوڈ اتھارٹی کی انفورسمنٹ ٹیم نے جمعہ کو نشتر ٹاؤن میں ایک آپریشن کے دوران نمکو بنانے والے یونٹ کو سیل کردیا۔ فوڈ سیفٹی ٹیم نے یہ کارروائی نمکو کی تیاری میں استعمال شدہ اور ناقص تیل کے استعمال اور موقع پر پائے جانے والے گندے تیل، ممنوعہ رنگوں اور کھلے مصالحہ جات کی وجہ سے کی۔
ڈائریکٹر جنرل عاصم جاوید نے بتایا کہ یہ ایکشن اس لیے لیا گیا کیونکہ اس یونٹ کو پہلے بھی سیل کیا گیا تھا، لیکن اسے قوانین کی خلاف ورزی کرتے ہوئے غیر قانونی طور پر دوبارہ کھول لیا گیا تھا۔ انہوں نے کہا کہ نمکو ٹوٹے ہوئے اور انتہائی گندے فرش پر براہِ راست تیار اور پیک کی جا رہی تھی، جو انسانی صحت کے لیے شدید خطرات کا باعث ہے۔
کاپی رائٹ بزنس ریکارڈر 2026
Comments