سونے کی قیمتوں میں اضافے کا نیا ریکارڈ، پہلی بار 5,200 ڈالر فی اونس کی سطح عبور

عالمی منڈی میں سونے کی قیمت نے بدھ کے روز پہلی بار 5,200 ڈالر فی اونس کی حد عبور کر لی، جبکہ اس سے ایک روز قبل منگل کو قیمت میں 3 فیصد سے زائد اضافہ دیکھا گیا تھا۔ ڈالر کی قدر تقریباً چار سال کی کم ترین سطح کے قریب پہنچنے اور جاری جغرافیائی و سیاسی خدشات کے باعث سرمایہ کار محفوظ سرمایہ کاری کی جانب متوجہ ہو رہے ہیں، جس سے قیمتی دھاتوں کی طلب میں اضافہ ہوا ہے۔ یہ پیش رفت امریکی فیڈرل ریزرو کے مانیٹری پالیسی فیصلے سے قبل سامنے آئی ہے۔

اسپاٹ گولڈ 0.6 فیصد اضافے کے ساتھ 5,219.97 ڈالر فی اونس تک پہنچ گیا، جبکہ اس سے قبل 5,224.95 ڈالر کی نئی ریکارڈ سطح بھی دیکھی گئی۔ رواں سال کے آغاز سے اب تک سونے کی قیمت میں 20 فیصد سے زیادہ اضافہ ہو چکا ہے۔ فروری ڈیلیوری کے لیے امریکی گولڈ فیوچرز بھی 2.6 فیصد اضافے کے بعد 5,216.80 ڈالر فی اونس تک جا پہنچے۔

ماہرین کے مطابق سونے کی حالیہ تیزی کی بڑی وجہ ڈالر کے ساتھ اس کا مضبوط الٹا تعلق ہے۔ اوانڈا کے سینئر مارکیٹ تجزیہ کار کیلوِن وونگ کے مطابق امریکی سیشن کے دوران سونے کی قیمت میں اضافہ اس وقت تیز ہوا جب صدر ڈونلڈ ٹرمپ کے ایک بیان سے یہ تاثر ملا کہ وائٹ ہاؤس میں کمزور ڈالر کے حق میں وسیع اتفاق رائے پایا جاتا ہے۔ ڈالر کو اس وقت اعتماد کے بحران کا سامنا ہے، جبکہ امریکی صارفین کا اعتماد بھی جنوری میں ساڑھے گیارہ سال کی کم ترین سطح پر آ گیا ہے۔

ٹرمپ نے یہ بھی عندیہ دیا ہے کہ وہ جلد امریکی مرکزی بینک کے سربراہ کے لیے اپنے نامزد امیدوار کا اعلان کریں گے اور پیش گوئی کی کہ نئی قیادت کے بعد شرح سود میں کمی آ سکتی ہے۔ تاہم فیڈرل ریزرو سے توقع ہے کہ وہ موجودہ اجلاس میں شرح سود کو برقرار رکھے گا۔

دوسری قیمتی دھاتوں میں چاندی 0.6 فیصد اضافے کے ساتھ 113.63 ڈالر فی اونس، پلاٹینم 1.5 فیصد اضافے سے 2,679.15 ڈالر، جبکہ پیلاڈیم 0.9 فیصد بڑھ کر 1,951.93 ڈالر فی اونس پر پہنچ گیا۔