بینک مکرمہ نے اسپانسر کی شیئر ہولڈنگ میں کمی کی اسکیم منظور کر لی

بینک مکرمہ لمیٹڈ (بی ایم ایل) نے اسپانسرز حصص (شیئرز) میں مجوزی تبدیلی اور اسکیم آف ارینجمنٹ کے مسودے کی منظوری دیدی ہے جس کے تحت اسپانسر کی حصہ داری میں کمی کی جائے گی اور زائد حصص باقی ماندہ شیئر ہولڈرز کو بلا معاوضہ منتقل اور تقسیم کردیے جائیں گے۔

بی ایم ایل نے اسٹاک ایکسچینج کو بھیجے گئے ایک نوٹس میں آگاہ کیا کہ اس اسکیم کی حتمی منظوری اسلام آباد ہائی کورٹ سے مشروط ہے۔

نوٹس میں کہا گیا کہ بینک میں موجود اسپانسرز شیئرز کی تعداد میں تبدیلی کی تجویز کے حوالے سے (بی ایم ایل میں ان کی کل حصہ داری اب 861,163,883 مکمل ادا شدہ عام حصص پر مشتمل ہے، جو بی ایم ایل کے کل پیڈ اپ کیپیٹل کا 86.1 فیصد بنتا ہے)، ری اسٹرکچرنگ اسکیم کے مطابق یہ حصص انہیں 2.14 روپے (جو اسکیم میں منظور شدہ قیمت تھی) کے بجائے 6.25 روپے فی شیئر کی قیمت پر جاری کیے جائیں۔

نوٹس میں مزید کہا گیا کہ اسپانسر کے مطابق حصہ داری (شیئر ہولڈنگ) کو کم کرکے 75.8 فیصد تک لانا بی ایم ایل اور اس کے دیگر شیئر ہولڈرز کے لیے سود مند ثابت ہو گا۔

مزید برآں بورڈ نے بینک کے واجب الادا ٹرم فنانس سرٹیفکیٹس کے حوالے سے بھی ایک تجویز کی منظوری دی، جو مالی، ریگولیٹری اور وسیع تر معاشی چیلنجز کے باعث اکتوبر 2018 سے غیر ادا شدہ (unpaid) چلے آ رہے ہیں۔

اس تجویز کے تحت بی ایم ایل ٹرم فنانس سرٹیفکیٹ ہولڈرز سے واجب الادا رقم کو بینک کے مکمل ادا شدہ عام حصص میں تبدیل کرنے کی منظوری حاصل کرے گا۔ اس کل رقم میں 1,495,515,000 روپے بطور اصل رقم اور 31 دسمبر 2025 تک جمع شدہ منافع کی مد میں 1,854,511,777.28 روپے شامل ہیں۔

یہ حصص 6.25 روپے فی شیئر کی قیمت پر جاری کیے جائیں گے (جس میں 94.734080314649 فیصد شیئر کمی کا رد و بدل شامل ہو سکتا ہے) اور یہ ٹی ایف سی ہولڈرز کو ان کی موجودہ حصہ داری کے تناسب سے الاٹ کیے جائیں گے۔ منظوری کی صورت میں، اس تبدیلی سے بینک کے شیئر کیپٹل میں 3,350,026,777 روپے کا اضافہ ہو گا۔