پاکستان، سعودیہ اور ترکیہ کے درمیان دفاعی معاہدہ زیرِ غور ہے، رضا حیات

پاکستان کے وزیرِ دفاعی پیداوار نے کہا ہے کہ تقریباً ایک سال تک جاری رہنے والی بات چیت کے بعد پاکستان، سعودی عرب اور ترکیہ نے ایک مجوزہ دفاعی معاہدے کا مسودہ تیار کر لیا ہے، جو گزشتہ دو برسوں میں خطے میں تشدد کے کسی ممکنہ بھڑکاؤ کے مقابلے کے لیے ایک حفاظتی انتظام کی کوشش کا اشارہ دیتا ہے۔

وزیرِ دفاعی پیداوار رضا حیات ہراج نے بدھ کے روز رائٹرز کو بتایا کہ تین علاقائی طاقتوں کے درمیان یہ ممکنہ معاہدہ گزشتہ سال اعلان کیے گئے دوطرفہ سعودی پاکستانی معاہدے سے الگ ہے۔ انہوں نے کہا کہ معاہدے کو حتمی شکل دینے کے لیے تینوں ریاستوں کے درمیان مکمل اتفاقِ رائے ضروری ہے۔

ایک انٹرویو میں رضا حیات ہراج نے کہا ہے کہ ” پاکستان، سعودی عرب اور ترکی کے درمیان سہ فریقی معاہدہ پہلے ہی زیرِ غور ہے۔“

انہوں نے مزید کہا کہ ”معاہدے کا مسودہ ہمارے پاس موجود ہے۔ یہی مسودہ سعودی عرب کے پاس بھی ہے اور ترکی کے پاس بھی۔ تینوں ممالک اس پر غور و خوض کر رہے ہیں، اور یہ معاہدہ گزشتہ 10 ماہ سے زیرِ بحث ہے۔“

جمعرات کو استنبول میں ایک پریس کانفرنس کے دوران، تینوں فریقوں کے درمیان مذاکرات سے متعلق میڈیا رپورٹس پر سوال کے جواب میں ترک وزیرِ خارجہ حاقان فیدان نے کہا کہ بات چیت ضرور ہوئی ہے، تاہم اب تک کسی معاہدے پر دستخط نہیں کیے گئے۔

فیدان نے کہا کہ خطے میں بداعتمادی پر قابو پانے کے لیے وسیع تر علاقائی تعاون اور اعتماد کی ضرورت ہے، کیونکہ یہی بداعتمادی ایسے ” خلا اور مسائل“ کو جنم دیتی ہے جن کے نتیجے میں بیرونی بالادست قوتیں ابھرتی ہیں، یا دہشت گردی کے باعث جنگ اور عدم استحکام پیدا ہوتا ہے۔

فیدان نے کہا کہ ” ان تمام عوامل کے بعد ہمارے پاس ایک تجویز یہ ہے کہ تمام علاقائی ممالک سلامتی کے معاملے پر تعاون کے ایک مشترکہ پلیٹ فارم کے لیے اکٹھے ہوں۔“
انہوں نے مزید کہا کہ اگر متعلقہ ممالک “ایک دوسرے پر اعتماد کریں” تو علاقائی مسائل حل ہو سکتے ہیں۔

انہوں نے کہا کہ ” اس وقت ملاقاتیں اور بات چیت جاری ہے، لیکن ابھی کسی معاہدے پر دستخط نہیں ہوئے۔ ہمارے صدر (طیب اردوان) کا وژن ایک ایسے جامع پلیٹ فارم کا ہے جو وسیع تر اور بڑی سطح پر تعاون اور استحکام کو فروغ دے،“ تاہم انہوں نے براہِ راست پاکستان یا سعودی عرب کا نام نہیں لیا۔