زرمبادلہ کے ذخائر میں 16 ملین ڈالر کا اضافہ ، 16.07 ارب ڈالر ہو گئے

اسٹیٹ بینک آف پاکستان (ایس بی پی) کے پاس موجود غیر ملکی زرمبادلہ کے ذخائر ہفتہ وار بنیادوں پر 16 ملین ڈالر اضافے کے ساتھ 9 جنوری 2026 تک 16.07 ارب ڈالر کی سطح پر پہنچ گئے۔

جمعرات کو جاری کردہ اعداد و شمار کے مطابق ملک کے کل مائع غیر ملکی ذخائر کی مالیت 21.25 ارب ڈالر رہی، جبکہ کمرشل بینکوں کے پاس موجود خالص غیر ملکی ذخائر 5.18 ارب ڈالر ریکارڈ کیے گئے۔

مرکزی بینک نے اپنے بیان میں کہا کہ 9 جنوری 2026 کو ختم ہونے والے ہفتے کے دوران اسٹیٹ بینک کے زرمبادلہ کے ذخائر 16 ملین ڈالر بڑھ کر 16,071.8 ملین (16.07 ارب) ڈالر ہو گئے ہیں۔

اعداد و شمار کے مطابق اسٹیٹ بینک کے پاس 16.07 ارب ڈالر کے ذخائر تھے، کمرشل بینکوں کے پاس 5.18 ارب ڈالر کے خالص غیر ملکی ذخائر موجود تھے۔ گزشتہ ہفتے بھی مرکزی بینک کے زرمبادلہ کے ذخائر میں معمولی اضافہ دیکھنے میں آیا تھا۔