کرسینٹ اسٹار کی ڈیجیٹل اور ورچوئل اثاثوں کی جانب پیش قدمی

پاکستانی انشورنس سروس فراہم کرنے والے ادارے کریسنٹ اسٹار انشورنس لمیٹڈ (سی ایس آئی ایل) نے ایس جی پاور لمیٹڈ (ایس جی پی ایل) کے ساتھ مجوزہ مشترکہ منصوبے کے ذریعے ڈیجیٹل اور ورچوئل اثاثوں کے شعبے میں داخل ہونے کا اشارہ دیا ہے۔ انشورنس کمپنی کا یہ اقدام اپنے روایتی انشورنس کاروبار سے ہٹ کر اسے وسعت دینے اور تنوع لانے کی کوششوں کا حصہ ہے۔

لسٹڈ کمپنی نے یہ پیشرفت جمعہ کو پاکستان اسٹاک ایکسچینج کو نوٹس میں ظاہر کی۔

کمپنی کے مطابق اس کے بورڈ آف ڈائریکٹرز نے 24 دسمبر 2025 کو ایک ہنگامی اجلاس میں اپنے سرمایہ کاری کے پورٹ فولیو اور طویل المدتی پلیٹ فارم حکمت عملی سے متعلق اسٹریٹجک امور کا جائزہ لیا۔

نوٹس میں کہا گیا کہ بورڈ نے اصولی طور پر کریسنٹ اسٹار انشورنس کی مکمل ملکیتی ذیلی کمپنی، کریسنٹ اسٹار ٹیکنالوجیز (پرائیویٹ) لمیٹڈ کو فعال کرنے کی منظوری دے دی ہے۔ یہ عمل ایس جی پاور لمیٹڈ کے ساتھ ایک مجوزہ مشترکہ منصوبے کے ذریعے انجام پائے گا، جس کے تحت توقع ہے کہ ایس جی پی ایل اس نئی کمپنی (سی ایس ٹی) میں 51 فیصد حصص (ایکویٹی اسٹیک) حاصل کر لے گی جبکہ بقیہ 49 فیصد حصص کریسنٹ اسٹار انشورنس کے پاس رہیں گے۔

یہ منظوری تمام ضروری ریگولیٹری اور کارپوریٹ منظوریوں کے حصول کے مشروط ہے۔

سی ایس ٹی (کریسنٹ اسٹار ٹیکنالوجیز)، جو اب سی ایس آئی ایل اور ایس جی پی ایل کے مشترکہ چھتری تلے کام کرے گی، ایک تفصیلی تجویز تیار کرے گی جس کا مقصد “پاکستان ورچوئل اثاثہ ریگولیٹری اتھارٹی یا کسی بھی دوسرے متعلقہ ادارے کو درخواست دینا ہے تاکہ سی ایس ٹی کو ڈیجیٹل اور ورچوئل اثاثوں سے متعلق سرگرمیاں شروع کرنے کے قابل بنایا جا سکے۔

نوٹس میں بتایا گیا ہے کہ اس کے علاوہ بورڈ نے اصولی طور پر ایس جی پاور لمیٹڈ میں کریسنٹ اسٹار انشورنس کی سرمایہ کاری کی پوزیشن پر نظرثانی کرنے کی بھی منظوری دے دی ہے، تاکہ سرمایہ کاری سے حاصل ہونے والے منافع کو بہتر سے بہتر بنایا جا سکے۔

بورڈ نے چیف ایگزیکٹو آفیسر اور کمپنی سیکریٹری کو اجازت دی ہے کہ وہ تیاری کا کام انجام دیں اور مجوزہ اقدامات کے سلسلے میں ضروری درخواستیں دائر کریں۔

سی ایس آئی ایل پاکستان میں ایک پبلک لمیٹڈ کمپنی کے طور پر سن 1957 میں کمپنیز ایکٹ 1913 (جو اب کمپنیز ایکٹ 2017 ہے) کے تحت قائم کی گئی تھی۔ یہ کمپنی غیر زندگی (نان لائف) جنرل انشورنس خدمات فراہم کرنے کے شعبے میں سرگرم عمل ہے، جو بنیادی طور پر آگ اور املاک کے نقصان، بحری، ہوائی اور نقل و حمل، موٹر، کریڈٹ و شورٹیشپ، حادثات و صحت، اور متفرق شعبوں پر مرکوز ہیں۔