اسرائیل کے لیے جاسوسی کا الزام، ایران میں ایک شخص کو پھانسی دے دی گئی

ایرانی عدلیہ کی خبرایجنسی میزان کے مطابق ایران نے ہفتے کو ایک شخص کو پھانسی دے دی، مذکورہ شخص کو اسرائیل کیلئے جاسوسی کرنے اور ایرانی اپوزیشن گروپوں کے ساتھ روابط رکھنے کے جرم میں سزا سنائی گئی تھی۔

اسرائیل کے ساتھ کئی دہائیوں پر محیط جنگ میں الجھے ہوئے ایران نے اب تک ایسے متعدد افراد کو سزائے موت دی ہے جن پر اسرائیل کی انٹیلی جنس سروس (موساد) کے ساتھ روابط رکھنے اور ملک کے اندر اسرائیلی کارروائیوں میں سہولت کاری کرنے کا الزام تھا۔

ایران ہیومن رائٹس گروپ نے ایکس پر بتایا کہ جس شخص کو سزائے موت دی گئی ہے، اس کی شناخت 27 سالہ آرکیٹیکچر کے طالب علم عقیل کشاورز کے نام سے ہوئی ہے۔

جون میں ایران اور اسرائیل کے درمیان طویل عرصے سے جاری کشیدگی باقاعدہ جنگ میں تبدیل ہوگئی، جب اسرائیل نے ایران کے اندر مختلف اہداف کو نشانہ بنایا۔ ان حملوں میں ایسی کارروائیاں بھی شامل تھیں جن میں موساد کے کمانڈوز کو ملک کی حدود میں گہرائی تک تعینات کیا گیا تھا۔

رواں سال اسرائیل کے لیے جاسوسی کے جرم میں سزائے موت پانے والے ایرانیوں کے ساتھ اموات کی تعداد میں نمایاں اضافہ ہوا ہے اور حالیہ مہینوں میں متعدد افراد کو موت کی سزا دی جا چکی ہے۔