مقدس مقامات کی بہتری کے لیے پنجاب حکومت کی کوششیں تیز

عقیدے ، تاریخ اور ورثے کے تحفظ پر نئی توجہ کے ساتھ پنجاب حکومت صوبے بھر میں مقدس مقامات کی بہتری کے لیے اپنی کوششیں تیز کر رہی ہے۔

پنجاب میں روحانی ورثے کی بحالی اور جدید خطوط پر استوار کرنے کے حکومتی عزم کے تحت سیکریٹری اور چیف ایڈمنسٹریٹر اوقاف پنجاب ڈاکٹر احسان بھٹہ نے حضرت میاں میرؒ کے مزار اور اس سے ملحقہ املاک کا دورہ کیا، جہاں انہوں نے انتظامی امور، صفائی ستھرائی اور بحالی کے اقدامات کا جائزہ لیا۔

یہ دورہ وزیر اعلیٰ پنجاب مریم نواز شریف کے واضح وژن اور خصوصی دلچسپی کی عکاسی کرتا ہے، جو روحانی مقامات اور مزارات کے تقدیس اور تاریخی اہمیت کو برقرار رکھتے ہوئے ان کی بہتری اور تزئین و آرائش کی خواہاں ہیں۔

چیف سیکریٹری پنجاب زاہد زمان خان بھی وزیر اعلیٰ کی ہدایات کے مطابق محکمہ اوقاف سے مکمل تعاون کر رہے ہیں اور اس اہم کام کی تکمیل کے لیے ضروری فنڈز کی فراہمی کو یقینی بنا رہے ہیں۔

اس موقع پر گفتگو کرتے ہوئے ڈاکٹر احسان بھٹہ نے کہا کہ دورے کے دوران دی گئی تمام ہدایات پر من و عن عملدرآمد کیا جائے گا۔

انہوں نے مزار کے احاطے میں واقع مسجد، لائبریری اور قبرستان کا معائنہ کیا اور انتظامی بہتری اور دیکھ بھال سے متعلق ضروری ہدایات جاری کیں۔ڈائریکٹر پروجیکٹس اوقاف رفیق نور وٹو اور دیگر سینئر افسران بھی موجود تھے، جنہوں نے جاری انتظامات کا جائزہ لیا اور ہدایات پر مؤثر عملدرآمد میں معاونت کی۔

دورے کے دوران ڈاکٹر احسان بھٹہ نے سابق چیف سیکریٹری عبداللہ سمبل کی قبر پر فاتحہ خوانی بھی کی اور عوام کے لیے گرانقدر خدمات پر انہیں خراجِ عقیدت پیش کیا۔

بعد ازاں سیکریٹری اوقاف نے قرآن بورڈ کا بھی دورہ کیا، جہاں انہوں نے صفائی کی اہمیت پر زور دیتے ہوئے کہا کہ اس سے ادارے کو زائرین اور طلبہ کے لیے بہتر طور پر استعمال میں لایا جا سکے گا۔

انہوں نے قرآن بورڈ کے آڈیٹوریم کا معائنہ بھی کیا اور اسے تعلیمی اور مذہبی سرگرمیوں کے لیے فعال بنانے کی غرض سے اس کی مرمت اور دیکھ بھال کی ہدایات جاری کیں۔

یہ دورہ اس امر کی عکاسی کرتا ہے کہ محکمہ اوقاف پنجاب بھر میں مزارات اور ان سے منسلک سہولتوں کی تقدیس، صفائی اور مؤثر استعمال کو یقینی بنانے کے لیے اپنے عزم پر قائم ہے۔

کاپی رائٹ بزنس ریکارڈر 2025