مال بردار گاڑیوں کی ہڑتال ، سائٹ ایسوسی ایشن کا ریلوے فریٹ سروس فوری شروع کرنے کا مطالبہ

سائٹ ایسوسی ایشن آف انڈسٹری (ایس اے آئی) نے مال بردار گاڑیوں کی ہڑتال کے باعث پیدا ہونے والے بحران کے پیشِ نظر فوری طور پر ریلوے فریٹ سروسز شروع کرنے کا مطالبہ کردیا۔ صدر ایسوسی ایشن احمد عظیم علوی نے کہا کہ سڑک کے ذریعے سامان کی ترسیل میں خلل نے پاکستان کی صنعتی اور تجارتی سرگرمیوں کو شدید متاثر کیا ہے۔

انہوں نے بتایا کہ سپلائی چین میں رکاوٹیں اور سامان کی بروقت ترسیل میں ناکامی سے کاروبار پر دباؤ بڑھ گیا ہے، جس سے برآمدکنندگان ڈیلیوری ڈیڈ لائن پوری نہیں کر پا رہے اور آرڈرز منسوخی کے خطرات بڑھ گئے ہیں جب کہ بند پورٹس پر کنٹینرز کے ڈیمارج اور ڈیٹینشن چارجز کاروباری کمیونٹی پر مالی بوجھ ڈال رہے ہیں۔

احمد علوی نے حکومت سے کہا کہ ہائی اسپیڈ ریلوے کارگو سروسز فوری متعارف کروائی جائیں، تاکہ سامان کی روانی یقینی بنے، نقل و حمل کے اخراجات کم ہوں اور صنعتی پیداوار متاثر نہ ہو۔

انہوں نے اس صورتحال کو انتہائی تشویشناک قرار دیتے ہوئے فوری کارروائی کا مطالبہ کیا۔