جنرل ایوی ایشن ایروڈروم نے ایک اور سنگِ میل عبور کر لیا

مریدکے کے قریب قائم نئے جنرل ایوی ایشن ایروڈروم لاہور نے ایک اور اہم آپریشنل سنگِ میل عبور کر لیا، جب وہاں کامیابی کے ساتھ جڑواں انجن والا طیارہ لینڈ کر گیا۔ اس سے قبل حال ہی میں سنگل انجن طیارے کی آمد بھی کامیابی سے مکمل کی گئی تھی۔

پاکستان ایئرپورٹس اتھارٹی (پی اے اے) کے ترجمان کے مطابق اس پرواز میں پی اے اے کے ڈائریکٹر جنرل ایئر وائس مارشل ذیشان سعید خود سوار تھے، جو ایروڈروم کے حفاظتی معیار، آپریشنل صلاحیت اور مجموعی تیاری پر ادارے کے بھرپور اعتماد کی عکاسی کرتا ہے۔

ترجمان نے بتایا کہ طیارے کی لینڈنگ انتہائی مہارت اور پیشہ ورانہ انداز میں انجام دی گئی، جس سے ایروڈروم کے مضبوط آپریشنل فریم ورک، تکنیکی تیاری اور جدید فضائی تقاضوں کے مطابق مؤثر ایئر سائیڈ کوآرڈینیشن کا عملی مظاہرہ ہوا۔

ان کا کہنا تھا کہ یہ کامیابی پاکستان کے جنرل ایوی ایشن شعبے میں ایک نمایاں پیش رفت ہے اور اس سے پاکستان ایئرپورٹس اتھارٹی کے اس عزم کی توثیق ہوتی ہے کہ وہ علاقائی ہوابازی کی صلاحیت بڑھانے، بنیادی ڈھانچے کو مضبوط بنانے اور قومی ہوابازی کے شعبے میں معیار اور عمدگی کو فروغ دینے کے لیے سرگرم ہے۔

ترجمان نے مزید بتایا کہ جنرل ایوی ایشن ایروڈروم لاہور کو شدید مون سون کے موسم کے باوجود صرف ڈھائی سال کی مدت میں مکمل کیا گیا، جس پر دو ارب روپے سے کچھ زائد لاگت آئی۔ یہ منصوبہ مشکل حالات میں مؤثر منصوبہ بندی اور کامیاب عملدرآمد کی ایک مثال ہے۔