عمران خان کی سابقہ اہلیہ جمائمہ کی ایلون مسک سے درخواست

پاکستان تحریکِ انصاف کے بانی عمران خان کی سابقہ اہلیہ، جمائمہ گولڈ اسمتھ نے عوامی سطح پر ایکس کے سربراہ ایلون مسک سے اپیل کی ہے کہ عمران خان کے حوالے سے ان کی پوسٹس کو محدود کیا جارہا اور چھپایا جا رہا ہے۔

گولڈ اسمتھ نے کہا کہ عمران خان کے ساتھ روا سلوک اور قانونی مشکلات کے بارے میں ان کی معلومات عوام تک نہیں پہنچ رہیں ۔ انہوں نے مسک سے درخواست کی کہ ان کے اکاؤنٹ پر جو رکاوٹیں ہیں، انہیں ختم کیا جائے۔

اپنی پوسٹ میں جمائمہ نے بتایا کہ ان کے دونوں بیٹوں کو اپنے والد عمران خان سے ملاقات یا بات کرنے کی اجازت نہیں دی گئی، جو کہ اقوامِ متحدہ کے مطابق 22 ماہ سے غیر قانونی قیدِ تنہائی میں ہیں۔

انہوں نے کہا کہ ایکس ہی وہ واحد پلیٹ فارم ہے جہاں وہ دنیا کو بتا سکتی ہیں کہ عمران خان ایک سیاسی قیدی ہیں، مگر ہر پوسٹ کی پہنچ پاکستان اور عالمی سطح پر تقریباً صفر تک محدود کر دی جاتی ہے۔

جمائمہ نے کہا کہ یہ سب کچھ اس کے باوجود ہو رہا ہے کہ مسک بار بار وعدہ کر چکے ہیں کہ ایکس آزاد اظہار رائے کی حفاظت کرے گا اور قانونی سیاسی اظہار کو خاموش نہیں کرے گا۔

اس سے قبل بھی جمائمہ گولڈ اسمتھ نے پاکستانی حکام پر الزام عائد کیا تھا کہ وہ ان کے بیٹوں کو والد سے بات کرنے سے روک رہے ہیں اور اگر وہ ملک میں ملاقات کی کوشش کریں تو ان کے خلاف قانونی کارروائی کی دھمکی دی گئی ہے۔

آخر میں انہوں نے ایلون مسک سے درخواست کی کہ آپ اس پلیٹ فارم کے لیے کیے گئے آزادی اظہار کے وعدے پورے کریں۔ براہ کرم @Jemima_Khan پر Grok کی جانب سے شناخت شدہ ‘سیکرٹ تھروٹلنگ’ کو ختم کریں۔”