لاہور ایئرپورٹ کی توسیع ستمبر 2026 تک مکمل ہوگی

پاکستان ایئرپورٹس اتھارٹی (پی اے اے) نے کہا ہے کہ ملک بھر میں ہوابازی کے بنیادی ڈھانچے اور مسافروں کی سہولیات کو بہتر بنانے کے اہم منصوبے جاری ہیں۔

لاہور کے علامہ اقبال انٹرنیشنل ایئرپورٹ کے ٹرمینل کی توسیع ستمبر 2026 تک مکمل ہونے کا شیڈول ہے، جبکہ کراچی کے جناح انٹرنیشنل ایئرپورٹ کی رن وے کی اپ گریڈیشن جنوری 2026 تک مکمل ہونے کی توقع ہے۔

پی اے اے نے مزید بتایا کہ اسکردو، گلگت اور چترال ایئرپورٹس پر آر این پی اے آر سسٹم کے تحت فلائٹ پروسیجرز جون 2026 تک نافذ کیے جائیں گے، جس سے موسمی حالات کی وجہ سے پروازوں میں تاخیر اور منسوخی میں نمایاں کمی متوقع ہے۔

ڈیرا اسماعیل خان، سکھر اور فیصل آباد میں نئے گرین فیلڈ ایئرپورٹس کی منصوبہ بندی بھی جاری ہے، جبکہ اسکردو ایئرپورٹ اور منڈی بہاؤالدین جنرل ایوی ایشن ایرروڈوم کی فیز ٹو اپ گریڈ اگلے سال شروع کی جائے گی۔

کراچی ایئرپورٹ پر نئے ایئر ٹریفک کنٹرول ٹاور اور ریسکیو-فائر اسٹیشن کے لیے حتمی مقامات کی منظوری دی گئی ہے، جو ہوائی ٹریفک مینجمنٹ اور سیکیورٹی کو مزید مضبوط کریں گے۔

پی اے اے کے مطابق یہ اقدامات پاکستان کے ہوابازی کے شعبے کو محفوظ، موثر اور قابل رسائی بنانے اور ملک بھر کے مسافروں کو جدید سہولیات فراہم کرنے کے لیے کیے جا رہے ہیں۔