سندھ بینک کی طویل مدتی کریڈٹ ریٹنگ ڈبل اے تک بڑھا دی گئی

وی آئی ایس کریڈٹ ریٹنگ کمپنی لمیٹڈ (وی آئی ایس) نے سندھ بینک لمیٹڈ (ایس این ڈی بی) کی طویل مدتی کیٹیگری میں ادارہ جاتی ریٹنگ بڑھا کر اے اے کر دی ہے، جو پہلے اے اے مائنس تھی، جبکہ بینک کی مختصر مدتی ریٹنگ اے اے پلس برقرار رکھی گئی ہے۔

طویل مدتی ریٹنگ اے اے مضبوط کریڈٹ کوالٹی اور کم سطح کے خطرات کی نشاندہی کرتی ہے، جو معاشی حالات کے مطابق معمولی طور پر بدل سکتے ہیں۔ مختصر مدتی ریٹنگ اےاے پلس بروقت ادائیگی کی انتہائی مضبوط صلاحیت اور بہترین لیکویڈیٹی کو ظاہر کرتی ہے۔ ریٹنگ آؤٹ لک ’مستحکم‘ ہے۔ قبل ازیں ریٹنگ کا اعلان 30 جون 2025 کو کیا گیا تھا۔

سندھ بینک مکمل طور پر حکومتِ سندھ کی ملکیت ہے اور اس کی سرپرستی ماضی میں وقتاً فوقتاً کیے گئے سرمایہ جاتی تعاون سے واضح ہے۔

بینک ایک دہائی سے زائد عرصے سے کمرشل، کارپوریٹ اور انویسٹمنٹ بینکنگ خدمات فراہم کر رہا ہے۔

کراچی میں ہیڈ آفس کے ساتھ بینک کا ملک گیر نیٹ ورک 330 برانچز پر مشتمل ہے، جن میں 8 سب برانچز اور 19 اسلامی بینکنگ برانچز شامل ہیں۔

ریٹنگ میں بہتری کی بنیادی وجہ بینک کے کارپوریٹ اور کمرشل فنانسنگ میں دوبارہ تیزی اور اس کے مستقبل کی منافع بخشی پر متوقع مثبت اثرات ہیں جبکہ مجموعی طور پر بینکاری شعبہ کم مارجن اور زیادہ ٹیکسوں کے چیلنجز سے دوچار ہے، سندھ بینک کی آمدنی کے اعتبار سے پوزیشن بہتر ہونے کی توقع ہے۔