کسٹمز نے منشیات کی بڑی اسملگلنگ ناکام بنادی، 55 کروڑ 24 لاکھ روپے کی 188 کلو چرس پکڑلی

پاکستان کسٹمز گڈانی نے منشیات اسمگل کرنے کی ایک بڑی کوشش ناکام بناتے ہوئے 188 کلوگرام ہیروئن برآمد کرلی۔

ترجمان وفاقی بورڈ آف ریونیو (ایف بی آر) کے مطابق پاکستان کسٹمز گڈانی نے منشیات کی ایک بڑی اسمگلنگ کی کوشش ناکام بناتے ہوئے تقریباً 188 کلوگرام ہیروئن برآمد کی جس کی مالیت تقریباً 552.44 ملین (55 کروڑ 24 لاکھ) روپے ہے۔

حکام کے مطابق اسمگل شدہ منشیات ایک کنٹینر لگی گاڑی سے برآمد کی گئی جسے کرخیرہ چیک پوسٹ پر روکا گیا۔ یہ کارروائی کسٹمز انفورسمنٹ، گڈانی کے کلکٹر کی فراہم کردہ معلومات کی بنیاد پر کی گئی۔ چیک پوسٹ پر سخت جانچ کے دوران اہلکاروں نے کٹ ٹائرز لے جانے والی گاڑی کو تفصیلی معائنہ کے لیے روکا۔

تلاشی کے دوران کنٹینر کے اندر دو بڑے سائز کے ٹائرز دریافت ہوئے جن میں منشیات چھپانے کے لیے جدید پوشیدہ طریقے استعمال کیے گئے تھے۔ تفصیلی معائنے کے بعد 169 پیکٹ ہیروئن برآمد ہوئے۔

حکام نے بتایا کہ برآمد شدہ منشیات اور گاڑی کی مجموعی مالیت 552.437 ملین روپے بنتی ہے۔ گاڑی کے ساتھ موجود شخص کو موقع پر حراست میں لیا گیا جب کہ منشیات، ٹائرز اور گاڑی کو کسٹمز ایکٹ 1969 کے تحت ضبط کر لیا گیا۔

ایف بی آر کا کہنا ہے کہ ادارہ منشیات کی اسمگلنگ کی ہر کوشش ناکام بنانے اور قانونی تجارت کے تحفظ کو یقینی بنانے کے لیے پُرعزم ہے۔