اشیائے ضروریہ کی قیمتوں کے استحکام کے لیے جامع پلان کی ہدایت

وفاقی وزیر منصوبہ بندی احسن اقبال نے متعلقہ تمام محکموں کو ہدایت کی ہے کہ وہ رمضان سے قبل زیادہ طلب والی اشیائے ضروریہ کی نشاندہی کریں اور قیمتوں کے استحکام کو یقینی بنانے کے لیے جامع حکمتِ عملی مرتب کریں۔

یہ ہدایات انہوں نے پیر کو نیشنل پرائس مانیٹرنگ کمیٹی کے اجلاس کی صدارت کرتے ہوئے دیں۔ اجلاس میں ملک بھر میں اشیائے خورونوش کی قیمتوں کی صورتحال، سپلائی چین اور افراطِ زر کے رجحانات کا جائزہ لیا گیا۔

وفاقی وزیر نے صوبائی حکومتوں اور ضلعی انتظامیہ کو تاکید کی کہ مارکیٹ مانیٹرنگ کے نظام کو مؤثر بنایا جائے،گرانفروشی کے خلاف سخت کارروائی کی جائے اور قیمتوں سے متعلق قواعد و ضوابط پر سختی سے عملدرآمد یقینی بنایا جائے۔

احسن اقبال نے بتایا کہ گزشتہ ایک سال میں مہنگائی میں واضح کمی آئی ہے، جو اکتوبر 2024 میں 7.2 فیصد سے گھٹ کر اکتوبر 2025 میں 6.2 فیصد تک آ گئی۔ انہوں نے اس کمی کے تسلسل کو برقرار رکھنے کے لیے فعال اور مضبوط مارکیٹ مینجمنٹ کی ضرورت پر زور دیا۔

اجلاس میں وفاقی وزیر نے حکام کو ہدایت کی کہ آئندہ اجلاس میں ضروری اشیائے خوردونوش کی دستیابی اور سپلائی کا تفصیلی منصوبہ پیش کیا جائے۔ انہوں نے زرعی مصنوعات کے لیے کولڈ چین سسٹم کے قیام کی اہمیت بھی اجاگر کی تاکہ رسد و طلب میں توازن برقرار رہے اور کٹائی کے بعد ہونے والے نقصانات میں کمی لائی جا سکے۔

شواہد اور ڈیٹا کی بنیاد پر فیصلہ سازی پر زور دیتے ہوئے وفاقی وزیر منصوبہ بندی نے تمام وزارتوں اور محکموں کو ڈیٹا پر مبنی تجزیاتی رپورٹس تیار کرنے کی ہدایت دی۔ انہوں نے کہا کہ پالیسی فیصلے صرف ٹھوس اعداد و شمار اور حقیقی مارکیٹ رجحانات کی بنیاد پر ہونے چاہئیں۔

احسن اقبال نے اس بات پر بھی زور دیا کہ وفاقی اور صوبائی اداروں کے درمیان ہم آہنگ اور مربوط حکمتِ عملی قیمتوں کے استحکام میں بنیادی کردار ادا کرے گی اور اس سے عوام کو غیر ضروری اور بلاجواز مہنگائی سے تحفظ حاصل ہوگا۔

کاپی رائٹ بزنس ریکارڈر 2025