وزیر اعظم نے کابل سے دہشت گرد گروپوں کے خلاف کارروائی کا مطالبہ کر دیا

وزیراعظم شہباز شریف نے کہا ہے کہ اگر افغان حکومت کالعدم تحریک طالبان پاکستان (ٹی ٹی پی) اور دیگر دہشت گرد گروہوں کے خلاف مؤثر کارروائی کرے تو پاکستان ہر ممکن تعاون کے لیے تیار ہے۔

یہ بات انہوں نے بین الاقوامی اسپیکرز کانفرنس کے افتتاحی اجلاس سے خطاب کرتے ہوئے کہی۔

وزیر اعظم نے کہا کہ افغانستان کو یہ سمجھنا چاہیے کہ ٹی ٹی پی اور دیگر دہشت گرد گروہوں پر لگام لگا کر ہی خطے میں پائیدار امن قائم کیا جاسکتا ہے۔

وزیر اعظم نے کہا کہ عسکریت پسند گروہ نہ صرف افغانستان کے اندر بلکہ سرحد کے پار بھی امن کو خطرے میں ڈال رہے ہیں۔ انہوں نے یاد دلایا کہ گزشتہ ماہ افغانستان کی جانب سے پاکستانی سرحدی چوکیوں پر حملے کے بعد پاکستان کا ردعمل فیصلہ کن اور مؤثر رہا جس نے حملہ آوروں کو سبق سکھایا۔

شہباز شریف نے کہا کہ پرامن افغانستان علاقائی روابط، ترقی اور خوشحالی کی کلید ہے، ۔ انہوں نے پاکستان اور افغان طالبان حکومت کے درمیان امن مذاکرات میں سہولت کاری کے لیے ترکیہ اور قطر کی کوششوں کو سراہا۔

وزیر اعظم نے زور دیا کہ پاکستان عالمی تعلقات اور کثیرالجہتی امور پر یقین رکھتا ہے اور یورپی یونین، امریکہ، جاپان، سعودی عرب اور دیگر بین الاقوامی پلیئرز کے ساتھ تعاون جاری رکھے گا۔

وزیر اعظم نے پارلیمنٹ کے کردار پر بھی روشنی ڈالی اور کہا کہ پارلیمنٹ عوام کی مرضی کی محافظ ہے اور اسے عوامی توقعات کا احترام کرتے ہوئے اجتماعی بہتری کے لیے کام کرنا چاہیے۔

کانفرنس کے دوران چیئرمین سینیٹ یوسف رضا گیلانی نے خطاب کرتے ہوئے کہا کہ امن، سلامتی اور ترقی لازمی ستون ہیں۔ امن اور سلامتی کے بغیر کوئی قوم ترقی نہیں کر سکتی اور ترقی کے بغیر امن کمزور رہتا ہے۔

یوسف رضا گیلانی نے عالمی سطح پر جنگ، اقتصادی جھٹکوں، موسمیاتی تبدیلیوں اور تیز رفتار تکنیکی رکاوٹوں کے سبب غیر معمولی عدم استحکام کی نشاندہی کی اور کہا کہ پارلیمنٹس کو ایسے اوقات میں رہنما کا کردار ادا کرنا چاہیے، تفہیم اور تعاون کو فروغ دینا چاہیے۔

انہوں نے کہا کہ پاکستان کی سرحدوں پر اشتعال انگیزیوں کے باوجود ملک نے نمایاں پختگی اور تحمل کا مظاہرہ کیا ہے اور مسلسل بات چیت کے ذریعے امن قائم رکھنے کی کوشش کی ہے۔

چیئرمین سینیٹ نے آئی ایس سی کے مندوبین پر زور دیا کہ وہ وعدوں سے آگے بڑھیں اور ایسے جرات مندانہ، قابل عمل حل پیش کریں جو شریک ممالک کے متنوع تجربات کی عکاسی کریں۔

کاپی رائٹ بزنس ریکارڈر 2025