پاکستان کی سعودی عرب کو ٹرانسپورٹ اور لاجسٹکس نیٹ ورک منصوبوں میں سرمایہ کاری کی دعوت

وفاقی وزیر برائے مواصلات عبدالعلیم خان نے مملکتِ سعودی عرب کو پاکستان کے بڑے موٹروے اور بنیادی ڈھانچے کے منصوبوں میں سرمایہ کاری کی دعوت دی ہے، یہ کہتے ہوئے کہ ملک کے بڑھتے ہوئے ٹرانسپورٹ اور لاجسٹکس نیٹ ورک میں سرمایہ کاری کے وسیع مواقع موجود ہیں۔

بیان کے مطابق یہ پیش رفت کراچی میں منعقدہ پاکستان انٹرنیشنل میری ٹائم ایکسپو اینڈ کانفرنس (پی آئی ایم ای سی 2025) کے موقع پر مملکت سعودی عرب کے وزیر ٹرانسپورٹ و لاجسٹک سروسز انجینئر صالح بن ناصر الجاسر سے عبدالعلیم خان کی ملاقات کے دوران ہوئی۔

ملاقات میں عبدالعلیم خان نے ٹرانسپورٹ، لاجسٹکس اور انفراسٹرکچر ڈویلپمنٹ کے شعبوں میں سعودی عرب کے ساتھ تعاون کو مزید فروغ دینے کی پاکستان کی خواہش کا اظہار کیا۔

انہوں نے کہا کہ پاکستان اور سعودی عرب کے درمیان اسٹریٹجک میوچوئل ڈیفنس ایگریمنٹ (ایس ایم ڈی اے) نے دونوں برادر ممالک کے تعلقات کو مزید مضبوط کیا ہے اور مختلف شعبوں میں تعاون کے لیے ایک وسیع فریم ورک فراہم کیا ہے۔

عبدالعلیم خان نے اس موقع پر بتایا کہ پاکستان کا سڑکوں کا انفراسٹرکچر فعال اور خود کفیل ہے، جو ایک مؤثر ٹول سسٹم کے ذریعے چلایا جا رہا ہے جو مرمت اور ترقی کے عمل میں نمایاں کردار ادا کرتا ہے۔

انہوں نے آگاہ کیا کہ وزارت مواصلات اور نیشنل ہائی وے اتھارٹی (این ایچ اے) شمالی علاقوں کو بڑے شہری و معاشی مراکز سے جوڑنے والے نئے موٹروے منصوبوں پر توجہ دے رہی ہیں، جن سے علاقائی تجارت اور رابطے کو مزید فروغ ملے گا۔

بیان کے مطابق وفاقی وزیر نے سعودی سرمایہ کاروں کو پاکستان کے بڑے بنیادی ڈھانچے کے منصوبوں میں سرمایہ کاری کی دعوت دی، جن میں ایم-6 موٹروے (سکھر–حیدرآباد)، ایم-10 موٹروے (حیدرآباد–کراچی پورٹ)، ایم-13 موٹروے (کھاریاں–راولپنڈی)، اور مانسہرہ–ناران–جلکھڈ–چلاس (این این جی سی) روڈ شامل ہیں۔

انہوں نے مزید کہا کہ ایم این جے سی منصوبہ سیاحت کے امکانات کے باعث تجارتی طور پر منافع بخش ہے اور سرمایہ کاروں کے لیے پرکشش موقع فراہم کرتا ہے۔

انہوں نے اس شراکت داری کے تحت انفراسٹرکچر کے شعبے میں تعاون کو مزید وسعت دینے کی صلاحیت پر بھی زور دیا۔

اس موقع پر سعودی وزیر نے آنے والے انٹرنیشنل میری ٹائم آرگنائزیشن (آئی ایم او) کے انتخابات میں پاکستان کی حمایت طلب کی، جس پر پاکستان نے مکمل تعاون کی یقین دہانی کرائی۔

سعودی وزیر نے پاکستان کی ترقیاتی کاوشوں کو سراہا اور مملکت کے لیے پاکستان کی مسلسل حمایت پر شکریہ ادا کیا۔ انہوں نے ٹیکنالوجی، روڈ سیفٹی اور لاجسٹکس منصوبوں میں سعودی تعاون اور شراکت داری کی پیشکش بھی کی۔