آرمی چیف کی مصری صدر سے ملاقات، علاقائی امن اور تعاون پر تبادلۂ خیال

چیف آف آرمی اسٹاف فیلڈ مارشل سید عاصم منیر، نشانِ امتیاز (ملٹری)، ہلالِ جرات، نے سرکاری دورے پر مصر میں ہفتے کے روز قاہرہ کے اتحادیہ صدارتی محل میں مصری صدر عبدالفتاح السیسی سے ملاقات کی ہے۔

آئی ایس پی آر کے مطابق دونوں رہنماؤں نے دوطرفہ تعلقات پر تبادلۂ خیال کیا اور پاکستان اور مصر کے درمیان دیرینہ دوستی کے عزم کا اعادہ کیا۔

ملاقات کے دوران آرمی چیف نے خطے میں امن و استحکام کے فروغ میں مصری قیادت کے کردار کو سراہا جبکہ صدر السیسی نے عالمی اور امتِ مسلمہ سے متعلق امور میں پاکستان کے تعمیری اور فعال کردار کی تعریف کی۔

دونوں فریقوں نے باہمی اسٹریٹجک مفادات کے امور پر ہم آہنگی کی اہمیت پر زور دیا اور عوام سے عوام اور ادارہ جاتی روابط کو مضبوط بنانے کے عزم کا اظہار کیا۔

انہوں نے تاریخی دوستانہ تعلقات کا اعتراف کرتے ہوئے مختلف شعبوں، خصوصاً سماجی و اقتصادی ترقی، ٹیکنالوجی اور سکیورٹی کے میدانوں میں تعاون کے دائرہ کار کو وسیع کرنے پر اتفاق کیا۔

ملاقات مثبت انداز میں اختتام پذیر ہوئی، جہاں دونوں رہنماؤں نے اس اعتماد کا اظہار کیا کہ اقتصادی اور سکیورٹی تعاون میں اضافہ خطے میں امن، استحکام اور خوشحالی کو فروغ دے گا۔