آرمی چیف کا پاکستان کی علاقائی سالمیت کی خلاف ورزی پر سخت ردعمل کے عزم کا اعادہ

چیف آف آرمی اسٹاف (سی او اے ایس) فیلڈ مارشل سید عاصم منیر نے منگل کے روز اس عزم کا اعادہ کیا ہے کہ پاکستان اپنی علاقائی سالمیت کی کسی بھی خلاف ورزی پر بھرپور اور فیصلہ کن ردِعمل دے گا۔ انہوں نے زور دیا کہ پاکستان خطے میں امن و استحکام کا خواہاں ہے، تاہم اپنی خودمختاری پر کوئی سمجھوتہ نہیں کرے گا۔

پاک فوج کے شعبہ تعلقاتِ عامہ (آئی ایس پی آر) کے مطابق آرمی چیف نے یہ بات جنرل ہیڈکوارٹرز (جی ایچ کیو) راولپنڈی میں منعقدہ 17ویں نیشنل ورکشاپ بلوچستان کے شرکاء سے گفتگو کے دوران کہی ہے۔

بلوچستان کی اہمیت کو اجاگر کرتے ہوئے آرمی چیف نے کہا کہ بلوچستان “پاکستان کا فخر” ہے، جو باصلاحیت، باہمت اور محبِ وطن عوام سے مالامال ہے اور یہی لوگ اس کی حقیقی دولت ہیں۔

انہوں نے کہا کہ وفاقی اور صوبائی حکومتیں عوامی مرکزیت کے نقطۂ نظر کے تحت بلوچستان کے سماجی و معاشی ڈھانچے میں بہتری لانے کے لیے ترقیاتی منصوبے جاری رکھے ہوئے ہیں۔

آرمی چیف نے اس بات پر زور دیا کہ صوبے کی بے پناہ اقتصادی صلاحیتوں کو عوام کی فلاح و بہبود کے لیے بروئے کار لایا جائے، اور سول سوسائٹی کے تعمیری کردار خصوصاً نوجوانوں کی شمولیت اور اختیارات کی تقسیم کے حوالے کو سراہا۔

ان کا کہنا تھا کہ نوجوانوں کی شمولیت پائیدار ترقی کے لیے ناگزیر ہے اور یہ منفی و تقسیم پیدا کرنے والے سیاسی ایجنڈوں کے مقابلے میں کلیدی کردار ادا کرتی ہے۔

فیلڈ مارشل عاصم منیر نے خبردار کیا کہ بھارت کی سرپرستی میں کام کرنے والے گروہ، فتنہ الہندوستان اور فتنہ الخوارج، بدنیتی پر مبنی عوام دشمن اور ترقی مخالف بیانیے پھیلا کر تشدد کو ہوا دینے کی کوشش کر رہے ہیں۔

انہوں نے اس عزم کا اعادہ کیا کہ صوبے سے ان دہشت گرد عناصر کے مکمل خاتمے کے لیے تمام ضروری اقدامات کیے جا رہے ہیں۔

اجلاس کا اختتام شرکاء کے ساتھ کھلے اور واضح سوال و جواب کے سیشن پر ہوا۔