مہینوں کی تاخیر کے بعد حکومت کا زیورات کی برآمدات اور درآمدات کی اجازت دینے کا فیصلہ

کئی ماہ تک وزارتِ تجارت اور وزیراعظم آفس کے درمیان اگر مگر کے بعد حکومت نے آخرکار زیورات کی برآمدات اور درآمدات دوبارہ شروع کرنے کا فیصلہ کر لیا ہے۔

ایک سرکاری عہدیدار کے مطابق، ’آخرکار وزیراعظم آفس نے وزارتِ تجارت کو سونے کی تجارت بحال کرنے کی اجازت دے دی ہے۔ اس حوالے سے ایک سمری اقتصادی رابطہ کمیٹی (ای سی سی) کو حتمی منظوری کے لیے بھجوائی گئی ہے۔

وزارتِ تجارت نے یہ بھی تجویز دی ہے کہ ایس آر او 760 کی تین ماہ کی معطلی کی مدت کو معاف کیا جائے تاکہ اس دوران سونے کے تاجروں کی تجارتی ذمہ داریوں کا تحفظ کیا جا سکے۔ ذرائع کے مطابق وزارت تجارت نے سفارش کی ہے کہ سونے کی تجارت کو ایک مؤثر تصدیقی طریقہ کار سے منسلک کیا جائے تاکہ مستقبل میں ایسے ریگولیٹری ابہامات دوبارہ پیدا نہ ہوں۔

8 اگست 2025 کو وفاقی وزیرِ تجارت جام کمال خان نے آل پاکستان اسمال جیمز جیولرز اینڈ ٹولز ایسوسی ایشن کو یقین دلایا تھا کہ ایس آر او 760 جلد بحال کر دیا جائے گا۔ انہوں نے صنعت کے نمائندوں اور برآمد کنندگان کی جانب سے پیش کردہ دلائل اور تجاویز پر اطمینان کا اظہار کیا تھا۔

ایس آر او 760(1) 2023، جو قیمتی پتھروں اور زیورات کی تجارت کے ضابطہ جاتی فریم ورک کو کنٹرول کرتا تھا، 8 جولائی 2025 کو ختم ہو گیا تھا۔ اس سے قبل 2 مئی 2025 کو وفاقی کابینہ نے اس ایس آر او کو معطل کرتے ہوئے ایک کمیٹی تشکیل دی تھی تاکہ اس کا جائزہ لے، خامیاں شناخت کرے اور 60 دنوں میں بہتری کے لیے سفارشات پیش کرے۔

کمیٹی نے پانچ اجلاس منعقد کیے، ایس آر او کا تفصیلی جائزہ لیا اور اپنی رپورٹ 4 جولائی 2025 کو وزیراعظم آفس کو پیش کی۔

بعد ازاں، 28 جولائی 2025 کو وزیراعظم آفس نے وزارتِ تجارت کو ہدایت کی کہ وہ نجی شعبے کے اسٹیک ہولڈرز سے مشاورت کرے۔ یہ مشاورت 8 اگست 2025 کو ہوئی، جہاں زیورات کے برآمد کنندگان نے کمیٹی کی سفارشات پر متفقہ طور پر حمایت کا اظہار کیا۔

اتفاقِ رائے کے بعد، وزارتِ تجارت نے وزیراعظم کو باضابطہ طور پر ایک نوٹ بھجوایا، جس میں ایس آر او 760 کی بحالی کی سفارش کی گئی اور اس بات کی نشاندہی کی گئی کہ سابقہ نظام کے تحت تجارتی اعدادوشمار میں کوئی تضاد رپورٹ نہیں ہوا تھا۔

یہ معاملہ قومی اسمبلی کی قائمہ کمیٹی برائے تجارت میں بھی اٹھایا گیا، جہاں چیئرمین جاوید حنیف خان نے وزارت پر زور دیا کہ اس مسئلے کو مزید تاخیر کے بغیر حل کیا جائے۔

اب جبکہ وزیراعظم آفس اس فیصلے پر متفق ہے، ای سی سی کی حتمی منظوری کے بعد سونے اور زیورات کی قانونی تجارت کی بحالی کی راہ ہموار ہونے کی توقع ہے۔

کاپی رائٹ بزنس ریکارڈر، 2025