مودی اور اسٹارمر کی ملاقات : بھارت ، برطانیہ تعلقات میں نمایاں پیش رفت

ہندوستان کے وزیر اعظم نریندر مودی نے برطانیہ کے وزیر اعظم کیئر اسٹارمر سے ممبئی میں ملاقات کی، جہاں انہوں نے ہندوستان برطانیہ تعلقات میں نمایاں پیش رفت کا اعلان کیا۔

دونوں رہنماؤں نے جولائی 2024 میں ہونے والے آزاد تجارتی معاہدے کو مضبوط کرنے اور اس کے تحت درآمدی مصنوعات پر محصولات میں کمی لانے پر اتفاق کیا۔

معاہدے کے مطابق ہندوستان وہسکی، کاسمیٹکس اور طبی آلات کی برطانوی اشیاء کی درآمد پر محصولات کم کرے گا، جبکہ برطانیہ ہندوستان سے منجمد جھینگے، کپڑے، جوتے اور کھانے کی اشیاء پر ڈیوٹی میں کمی کرے گا۔ وزیر اعظم مودی نے کہا کہ یہ ترقی دونوں ممالک کے لیے اقتصادی مواقع کھولے گی، تجارت کو فروغ دے گی اور نوجوانوں کو روزگار کے نئے مواقع فراہم کرے گی۔

کیئر اسٹارمر نے ہندوستان کی اقتصادی ترقی کو سراہتے ہوئے کہا کہ 2028 تک ہندوستان دنیا کی تیسری بڑی معیشت بننے کے لیے پرعزم ہے اور برطانیہ اس ترقی کے سفر میں شراکت دار بننا چاہتا ہے۔ انہوں نے ہندوستان میں نو برطانوی یونیورسٹیوں کے کیمپس کھولنے کا بھی اعلان کیا ، تاکہ تعلیمی مراسم کو مزید فروغ دیا جا سکے۔

دونوں رہنماؤں نے دفاع، تجارت، سکیورٹی اور ٹیکنالوجی کے شعبوں میں تعاون کو بڑھانے پر بھی بات چیت کی۔ اس ملاقات کے بعد دونوں وزرائے اعظم نے کہا کہ ان کے ہاہمی تعلقات کے نتیجے میں نئی توانائی اور مواقع پیدا ہوئے ہیں جو عالمی استحکام اور اقتصادی ترقی کے لیے اہم ہیں۔

یہ دورہ بھارت اور برطانیہ کے درمیان دوطرفہ تعلقات کو مضبوط بنانے اور بڑے پیمانے پر سرمایہ کاری و اشتراک کی راہوں کو کھولنے میں سنگ میل سمجھا جا رہا ہے۔