صحافیوں پر تشدد کسی صورت برداشت نہیں ، محسن نقوی

وزیر داخلہ محسن نقوی نے نیشنل پریس کلب (این پی سی) اسلام آباد میں پیش آنے والے ناخوشگوار واقعے کا نوٹس لیتے ہوئے آئی جی اسلام آباد پولیس سے رپورٹ طلب کر لی۔

وزارتِ داخلہ نے جمعرات کو جاری بیان میں کہا کہ یہ اس وقت سامنے آیا جب اسلام آباد پولیس کے اہلکار نیشنل پریس کلب میں داخل ہوئے اور جموں کشمیر جوائنٹ ایکشن کمیٹی (جے کے جے اے سی) کے زیر اہتمام احتجاج کے دوران صحافیوں کو تشدد کا نشانہ بنایا۔

وزیر داخلہ نے واقعے کی تحقیقات کا حکم دیتے ہوئے کہا کہ صحافی برادری پر تشدد کسی صورت برداشت نہیں کیا جائے گا۔ انہوں نے ہدایت دی کہ واقعے میں ملوث اہلکاروں کی نشاندہی کر کے ان کے خلاف محکمانہ کارروائی کی جائے۔

دوسری جانب ہیومن رائٹس کمیشن آف پاکستان (ایچ آر سی پی) نے بھی این پی سی پر چھاپے اور صحافیوں پر پولیس تشدد کی مذمت کی اور مطالبہ کیا کہ فوری انکوائری کر کے ذمہ داروں کو انصاف کے کٹہرے میں لایا جائے۔

متعدد صحافیوں نے اس واقعے پر شدید ردعمل دیتے ہوئے کہا کہ مظاہرے کی کوریج کرنے والے میڈیا نمائندوں کو نشانہ بنانا قابل مذمت ہے ۔

خیال رہے کہ آزاد جموں و کشمیر میں حالیہ پرتشدد مظاہروں میں تین پولیس اہلکار جاں بحق اور متعدد زخمی ہو چکے ہیں۔ وزیراعظم شہباز شریف نے جمعرات کو آزاد کشمیر کی کشیدہ صورتحال پر تشویش ظاہر کرتے ہوئے عوام سے پرامن رہنے اور قانون نافذ کرنے والے اداروں کو صبر و تحمل کا مظاہرہ کرنے کی ہدایت کی۔

جے اے سی آزاد کشمیر حکومت اور وفاقی وزرا کے درمیان مراعات اور پناہ گزین نشستوں پر مذاکرات ناکام ہونے کے بعد آزاد کشمیر میں تین روزہ ہڑتال اور ریلیوں کے دوران کشیدگی بڑھ گئی اور مواصلاتی نظام بھی معطل رہا۔ بعد ازاں وفاقی وزیر طارق فضل چوہدری اور وزیراعظم آزاد کشمیر چوہدری انوار الحق نے جے اے سی کو نئے مذاکرات کی دعوت دی۔