ایشیا کپ 2025 کے سپر فور مرحلے کا شیڈول جاری کردیا گیا جس میں 4 فائنلسٹ ٹیموں کے درمیان 6 میچ کھیلے جائیں گے۔
افغانستان کو سری لنکا کے ہاتھوں شکست کے بعد ایونٹ میں سپر فور ٹیموں کے انتخاب کا عمل 18 ستمبر کو مکمل ہوا۔
سری لنکا نے افغانستان کو 6 وکٹ سے شکست دے کر سپر فور مرحلے کیلئے کوالیفائی کیا جس کے ساتھ ہی افغانستان کا ایونٹ میں سفر ختم ہوا اور بنگلہ دیش ٹیم اگلے مرحلے میں پہنچ گئی۔
اس کے ساتھ ہی ایشیا کپ کے سپر فور مرحلے کے لیے ٹیموں کا تعین ہوگیا جس کے مطابق گروپ اے سے بھارت اور پاکستان جبکہ گروپ بی سے سری لنکا اور بنگلہ دیش اگلے مرحلے کے لیے کوالیفائی کرگئے۔
ٹورنامنٹ کے پہلے مرحلے کا آخری میچ جمعہ کو بھارت اور عمان کے درمیان کھیلا گیا جس میں مینز اِن بلیو نے 21 رنز سے کامیابی حاصل کی۔
سپر فور میچز
شیڈول کے مطابق سپرفور مرحلے کا آغاز ہفتے (آج) کو دبئی میں بنگلہ دیش اور سری لنکا کے درمیان میچ سے ہوگا۔ اس مرحلے کے چھ میچز کے بعد دو بہترین ٹیمیں فائنل کے لیے منتخب ہوں گی جو 28 ستمبر (اتوار) کو کھیلا جائے گا۔
روایتی حریف پاکستان اور بھارت اتوار (کل) کو دبئی میں ایک دوسرے کے مدمقابل ہوں گے۔
اس کے بعد پاکستان اور سری لنکا 23 ستمبر (منگل) کو ابوظہبی میں مد مقابل ہوں گے جبکہ بنگلہ دیش اور بھارت 24 ستمبر (بدھ) کو دبئی میں ایک دوسرے سے ٹکرائیں گے۔
پاکستان اور بنگلہ دیش کے درمیان میچ 25 ستمبر (جمعرات) کو دبئی میں کھیلا جائے گا جبکہ بھارت اور سری لنکا 26 ستمبر (جمعہ) کو دبئی میں آمنے سامنے ہوں گے۔
سپر فور مرحلے کے بعد ٹاپ دو ٹیموں کے درمیان فائنل 28 ستمبر کو کھیلا جائے گا۔
Comments
Comments are closed.