پاکستان کا دسمبر سے قبل پانڈا بانڈ جاری کرنے کا فیصلہ

بلومبرگ نیوز کی رپورٹ کے مطابق، پاکستان رواں سال دسمبر سے قبل اپنے پہلے پانڈا بانڈز کے اجرا کی تیاری کررہا ہے۔

رپورٹ کے مطابق، پاکستان کا مقصد یوآن کے قرض کے ذریعے 2.5 کروڑ ڈالر جمع کرنا ہے۔ یہ بانڈز چین کی قومی انٹر بینک مارکیٹ میں نجی طور پر پیش کیے جائیں گے اور صرف مستند ادارہ جاتی سرمایہ کاروں کو دستیاب ہوں گے۔

رپورٹ کے مطابق بانڈ کی متوقع شرح منافع سالانہ 3 فیصد سے 4 فیصد کے درمیان ہوگی اور اس کا دورانیہ تین سال ہوگا۔

سودے کو چین انٹرنیشنل کیپٹل کارپوریشن لمیٹڈ اور حبیب بینک لمیٹڈ جیسے مالیاتی مشیروں اور انڈر رائٹرز کے کنسورشیم کے ساتھ ترتیب دیا جارہا ہے۔

جولائی میں وزارت خزانہ کے نمائندوں نے بیجنگ، چین میں غیر سودے پر مبنی سرمایہ کار روڈ شو کے تحت ابتدائی مارکیٹنگ اور سرمایہ کار ملاقاتوں کا سلسلہ شروع کیا، جو پاکستان کے پہلے پانڈا بانڈ کے اجرا کی تیاری کا حصہ تھا۔

پہلا پانڈا بانڈ اس سال جاری ہونے کی توقع ہے، جس کے لیے تمام دستاویزات اور ضروری منظوریوں، بشمول کثیرالجہتی ترقیاتی شراکت داروں سے کریڈٹ گارنٹی، کی تکمیل ضروری ہے۔

وفاقی وزیر خزانہ محمد اورنگزیب نے کہا ہے کہ پاکستان نے پہلے ڈالر اور یورو میں کئی بانڈز جاری کیے ہیں، لیکن ہم نے ابھی تک چینی سرمایہ مارکیٹ میں قدم نہیں رکھا۔ ہمیں امید ہے کہ اس سال کے دوران یہ اقدام اٹھایا جائے گا۔

وزیر خزانہ نے یہ بھی کہا کہ پانڈا بانڈ کے اجراء کا حجم تقریباً 300 ملین امریکی ڈالر ہوگا۔