امیج ریئٹ کا کامیاب اجرا؛ پی ایس ایکس میں 92 کروڑ روپے سے زائد سرمایہ اکٹھا

سائنو لنک ریئٹ مینجمنٹ کمپنی نے دو روزہ بک بلڈنگ (ڈَچ بِڈنگ) عمل کے دوران امیج ریئٹ کے 92.02 ملین یونٹس فروخت کر کے 921.07 ملین روپے کامیابی سے اکٹھے کر لیے ہیں۔ یہ عمل جمعرات کے روز پاکستان اسٹاک ایکسچینج (پی ایس ایکس) میں مکمل ہوا۔

یونٹ کی اسٹرائیک قیمت 10 روپے کی ابتدائی (فلور) قیمت سے معمولی اضافے کے ساتھ 10.01 روپے مقرر ہوئی۔

پی ایس ایکس کے ایک عہدیدار کے مطابق یہ سال 2025 میں پی ایس ایکس پر تیسرا ابتدائی عوامی اجرا (آئی پی او) تھا، جس سے قبل زاریا لمیٹڈ اور برکت فریشیئن ایگرو اپنے آئی پی او مکمل کر چکے ہیں۔

دورانِ بک بلڈنگ، اسٹرائیک قیمت کو 40 فیصد اضافے کے ساتھ زیادہ سے زیادہ 14 روپے فی یونٹ تک جانے کی اجازت دی گئی تھی، تاہم سرمایہ کاروں نے 10 سے 11.01 روپے فی یونٹ کی حد میں بولیاں دیں۔

ٹاپ لائن سیکیورٹیز، جو اس آئی پی او کی مشیر اور بُک رنر کمپنی ہے، کے مطابق “بک بلڈنگ مرحلہ دو گنا سے زائد سبسکرائب ہوا، جہاں 92.02 ملین یونٹس کی پیشکش کے مقابلے میں سرمایہ کاروں نے 186.80 ملین یونٹس کے حصول میں دلچسپی ظاہر کی۔”

گروتھ سیکیورٹیز اس اجرا میں مشترکہ مشیر اور بُک رنر کے طور پر شامل ہے۔

امیج ریئٹ کراچی میں دو اہم منصوبوں کے ذریعے آمدن پیدا کرتی ہے: شاہراہ فیصل پر واقع ایک آٹھ منزلہ مکمل کرایہ والی کمرشل عمارت اور ٹپوسلطان روڈ پر واقع ایک رہائشی و تجارتی منصوبہ، جس سے فروخت اور کرایے کی صورت میں آمدنی متوقع ہے۔

ریئٹ مینجمنٹ کے حالیہ بیان کے مطابق “ آئی پی او سے حاصل شدہ رقم کو ڈیویلپمنٹل ریئٹ پراجیکٹ کی گیارہ رہائشی منزلوں کی تکمیل اور مارکیٹنگ پر خرچ کیا جائے گا۔”

اس منصوبے کے لیے مرکزی ڈیپازٹری کمپنی آف پاکستان لمیٹڈ (سی ڈی سی) کو بطور ٹریسٹی مقرر کیا گیا ہے۔