پاکستان میں لیتھیم-آئن بیٹریز کی فروخت کیلئے ٹریٹ بیٹری کا چینی کمپنی کے ساتھ معاہدہ

پاکستانی لیڈ ایسڈ بیٹری ساز، ٹریٹ بیٹری لمیٹڈ (ٹی بی ایل) نے چینی ٹیکنالوجی کمپنی ہائی اسٹار ڈیجیٹل انرجی ٹیکنالوجی(گوانگ ڈونگ) کمپنی لمیٹڈ کے ساتھ پاکستان میں لیتھیم-آئن بیٹریز کی درآمد اور فروخت کے لیے معاہدہ کر لیا ہے۔

یہ پیش رفت ایسے وقت میں سامنے آئی ہے جب پاکستان کی بیٹری انڈسٹری میں توانائی ذخیرہ کرنے کے حل کے لیے طلب میں اضافہ ہو رہا ہے، خاص طور پر قابل تجدید توانائی کے شعبے میں۔ حکومت کی جانب سے قابل تجدید توانائی کے فروغ کے اقدامات کے باعث ری نیو ایبل بیٹریز کی اہمیت بڑھ رہی ہے۔

پاکستان اسٹاک ایکسچینج میں جمع شدہ نوٹس کے مطابق، کمپنی نے بتایا کہ ہم یہ اطلاع دینا چاہتے ہیں کہ ٹریٹ بیٹری لمیٹڈ نے ہائی اسٹار ڈیجیٹل انرجی ٹیکنالوجی (گوانگ ڈونگ) کمپنی لمیٹڈ کے ساتھ پاکستان میں لیتھیم-آئن بیٹریز کی درآمد اور فروخت کے لیے معاہدہ کر لیا ہے۔

ٹریٹ بیٹری لمیٹڈ، جو مشہور ٹریٹ کارپوریشن کی ذیلی کمپنی ہے، پاکستان کی بیٹری مینوفیکچرنگ انڈسٹری میں اعلی معیار کی لیڈ ایسڈ بیٹریز کے ساتھ قدم رکھ چکی ہے۔ اپنی پیرنٹ کمپنی کی قائم شدہ ساکھ سے فائدہ اٹھاتے ہوئے، ٹریٹ بیٹری آٹو موبائل اور توانائی ذخیرہ کرنے کے شعبوں میں اپنی موجودگی کو بڑھانے کا ارادہ رکھتی ہے۔

کمپنی بنیادی طور پر کار، موٹر سائیکل، ٹرک سمیت دیگر آٹوموبائلز کے لیے بیٹریز تیار کرتی ہے، نیز بیک اپ پاور سسٹمز اور قابل تجدید توانائی ذخیرہ کرنے کے لیے بیٹریز بھی بناتی ہے۔

نوٹس میں اس معاہدے کو ایک اسٹریٹجک اقدام قرار دیتے ہوئے کہا گیا کہ یہ معاہدہ کمپنی کو تیزی سے بڑھتے ہوئے لیتھیم-آئن بیٹری سیکٹر میں قدم رکھنے کا راستہ فراہم کرے گا اور موجودہ لیڈ ایسڈ بیٹری آپریشنز کو سپورٹ کرے گا۔

کمپنی کے مطابق، ہائی اسٹار کے ساتھ اس شراکت داری سے ٹی بی ایل کو اپنی مصنوعات کے مجموعے کو متنوع بنانے اور قابل تجدید توانائی، الیکٹرک موبلٹی اور پائیدار پاور ایپلیکیشنز میں ابھرتے مواقع سے فائدہ اٹھانے کا موقع ملے گا۔

ٹریٹ بیٹری کا ماننا ہے کہ لیتھیم-آئن ٹیکنالوجی کو مقامی مارکیٹ میں متعارف کروا کر کمپنی اپنی مسابقتی پوزیشن کو مضبوط کرے گی، آمدنی کے ذرائع کو بڑھائے گی اور شیئر ہولڈرز کے لیے طویل مدتی قدر پیدا کرے گی۔

نوٹس میں مزید کہا گیا کہ مینجمنٹ کو یقین ہے کہ یہ پیش رفت مستقبل کی ترقی کو سپورٹ کرے گی اور کمپنی کی سمت میں سرمایہ کاروں کا اعتماد بڑھائے گی۔