کراچی میں بارشوں کا سلسلہ بدھ تک جاری رہنے کا امکان

محکمہ موسمیات پاکستان (پی ایم ڈی) نے پیشگوئی کی ہے کہ پیر کی صبح ہونے والی بارشوں کے بعد بدھ تک کراچی میں بڑے پیمانے پر موسلادھار بارشوں کا سلسلہ جاری رہے گا۔

صبح کی بارش نے شہر کے موسم کو خوشگوار بنا دیا ہے اور اب تک سڑکوں پر پانی جمع نہیں ہوا اور معاملات معمول کے مطابق چل رہے ہیں۔

محکمہ موسمیات کے ایک سینئر عہدیدار انجم نذیر ضیغم نے کہا کہ مزید بارشیں کراچی اور سندھ کے کئی شہروں میں ہوں گی کیونکہ گہرے دباؤ کا مرکز اس وقت تھرپارکر میں موجود ہے۔ انہوں نے کہا کہ آئندہ 24 گھنٹوں میں یہ سسٹم کچھ کمزور ہوکر ڈپریشن کی شکل اختیار کر لے گا اور پھر صوبے کے شمال مغربی حصوں کی جانب بڑھ جائے گا۔

محکمہ موسمیات نے اپنے بیان میں کہا کہ گرج چمک کے ساتھ تیز ہواؤں اور وقفے وقفے سے شدید سے نہایت شدید بارشیں/کچھ مقامات پر غیر معمولی بارشیں تھرپارکر، عمرکوٹ، میرپورخاص، سانگھڑ، شہید بے نظیر آباد، ٹنڈو محمد خان، ٹنڈو اللہ یار، حیدرآباد، ٹھٹہ اور کراچی ڈویژن میں 10 ستمبر تک متوقع ہیں۔

محکمہ موسمیات نے خبردار کیا کہ موسلادھار بارشوں کے نتیجے میں کراچی اور دیگر شہروں کے نشیبی علاقوں میں اربن فلڈنگ اور پانی جمع ہوسکتا ہے جبکہ دادو ضلع کے پہاڑی نالوں میں اچانک سیلابی ریلوں کا خدشہ ہے۔

فلڈ فورکاسٹنگ ڈویژن نے بھی بدھ تک سندھ کے بڑے شہروں میں شدید اربن فلڈنگ کا خدشہ ظاہر کیا ہے۔

موسمیاتی انتباہ میں کہا گیا ہے کہ حب ڈیم میں پانی کی سطح بلند ہوسکتی ہے۔ صوبے کے سیلاب سے متاثرہ علاقوں میں مزید بارشیں صورتحال کو مزید سنگین بنا سکتی ہیں۔ تیز ہوائیں کمزور ڈھانچوں جیسے کچے مکانات کی چھتیں/دیواریں، بجلی کے کھمبے، بل بورڈز، گاڑیاں اور سولر پینل وغیرہ کو نقصان پہنچا سکتی ہیں۔ کسان حضرات کو چاہیے کہ وہ اپنی سرگرمیاں موسم کو مدِنظر رکھتے ہوئے منظم کریں۔

محکمہ موسمیات نے تمام متعلقہ حکام کو ہائی الرٹ رہنے اور ضروری اقدامات کرنے کی ہدایت دی ہے تاکہ کسی بھی ناخوشگوار صورتحال سے بچا جا سکے۔

دوسری جانب وزیراعلیٰ سندھ مراد علی شاہ نے اتوار کو کہا کہ دریائے سندھ میں سیلاب انتہائی بلند سطح پر پہنچنے میں تاخیر ہوگئی ہے اور اب یہ 9 ستمبر کو گڈو بیراج پر پہنچنے کی توقع ہے، جہاں پانی کا بہاؤ 800,000 کیوسک سے زائد ہوگا۔

وزیراعلیٰ نے کہا کہ تیاری کے طور پر دریا کے کناروں پر رہنے والی کمزور آبادیوں کی انخلا کی رفتار تیز کر دی گئی ہے۔

انہوں نے کراچی میں نیو سیکریٹریٹ میں قائم رین اینڈ ایمرجنسی مانیٹرنگ سیل میں میڈیا سے گفتگو کرتے ہوئے یہ بات کہی۔ اس موقع پر صوبائی وزیر اطلاعات شرجیل میمن، وزیر بحالیات مخدوم محبوب، چیف سیکریٹری آصف حیدر شاہ اور دیگر بھی موجود تھے۔

وزیراعلیٰ نے کہا کہ کمشنرز نے کچے کے علاقوں میں رہائشیوں کو اپنے گھر خالی کرکے محفوظ مقامات پر منتقل ہونے کے اعلانات شروع کر دیے ہیں۔ انہوں نے اس بات کی بھی تصدیق کی کہ صوبائی وزرا دریائے سندھ کے دونوں کناروں پر انخلا کے عمل کی براہ راست نگرانی کر رہے ہیں۔