وزیراعظم شہباز شریف کی وزرا کو پنجاب میں سیلاب متاثرہ علاقوں کے دورے کی ہدایت

وزیراعظم شہباز شریف نے بدھ کے روز وفاقی وزرا کو ہدایت کی کہ وہ فوری طور پر پنجاب کے سیلاب سے متاثرہ علاقوں کا دورہ کریں اور جاری ریسکیو اور ریلیف آپریشنز کی ذاتی طور پر نگرانی کریں۔

وزیراعظم آفس کے جاری کردہ بیان میں کہا گیا کہ وزیراعظم نے وزرا کو ہدایت دی کہ وہ اپنے اپنے حلقوں میں موجود رہیں تاکہ انخلا، ریسکیو اور ریلیف سرگرمیوں کی براہِ راست نگرانی کر سکیں۔

یہ ہدایات ایسے موقع پر دی گئیں جب نیشنل ڈیزاسٹر مینجمنٹ اتھارٹی (این ڈی ایم اے) نے پنجاب اور آزاد جموں و کشمیرکے مختلف اضلاع میں شدید بارشوں کا الرٹ جاری کیا ہے۔

حکام نے عوام کو ہدایت دی کہ احتیاطی تدابیر اختیار کریں، دریاؤں، ندی نالوں اور نشیبی علاقوں کے قریب جانے سے گریز کریں اور غیر ضروری سفر نہ کریں۔

اس سے قبل این ڈی ایم اے نے خبردار کیا تھا کہ دریائے ستلج جو اس وقت گنڈا سنگھ والا کے مقام پر اونچے سیلابی سطح پر ہے، بھارت کی جانب سے پانی چھوڑے جانے کے باعث انتہائی بلند سیلابی سطح تک پہنچ سکتا ہے۔

اسی دوران وزیراعظم نے این ڈی ایم اے کے چیئرمین کو ہدایت دی کہ وہ صوبائی ڈیزاسٹر مینجمنٹ اتھارٹی (پی ڈی ایم اے) کے ساتھ قریبی رابطہ رکھیں، مقامی انتظامیہ کو مکمل معاونت فراہم کریں، کمزور کمیونٹیز کو پیشگی وارننگ جاری کریں اور خطرے سے دوچار آبادیوں کو فوری طور پر محفوظ مقامات پر منتقل کرنے کو یقینی بنائیں۔

وزیراعظم نے مزید زور دیا کہ دریاؤں کے کناروں پر بسنے والے افراد کی محفوظ مقامات پر منتقلی کے عمل کو مزید مؤثر اور تیز بنایا جائے اور اس میں کسی قسم کی تاخیر نہ کی جائے۔

انہوں نے کہا کہ ریلیف آپریشنز کی رفتار کو مزید تیز کیا جائے اور اداروں کے درمیان تعاون کو مزید مضبوط بنایا جائے۔