لاہور ایکسپو میں میرا برانڈ پاکستان نمائش کا 14 اگست سے آغاز

میرا برانڈ پاکستان ایکسپو 14 اور 15 اگست کو لاہور ایکسپو سینٹر میں منعقد ہوگا۔ ایونٹ کا مقصد پاکستانی مصنوعات و صنعتوں اور ملکی معیشت میں خود انحصاری کو فروغ دینا ہے۔

یہ بات ایک مشترکہ پریس کانفرنس میں بتائی گئی جو لاہور چیمبر اور پاکستان بزنس فورم کے زیر اہتمام منعقد کی گئی۔

پریس کانفرنس سے خطاب کرتے ہوئے لاہور چیمبر آف کامرس اینڈ انڈسٹری کے صدر میاں ابوذر شاد، سینئر نائب صدر انجینئر خالد عثمان، چودھری محسن بشیر، اعجاز تنویر، عبدالاودود علوی اور عاصم شفیق شیخ نے مقامی طور پر تیار کردہ مصنوعات پر اعتماد پیدا کرنے اور ”میڈ ان پاکستان“ کی شناخت کو فروغ دینے کی اہمیت پر زور دیا۔

میاں ابوذر شاد نے کہا کہ اب وقت آگیا ہے کہ غیر ملکی مصنوعات پر انحصار ختم کیا جائے اور مقامی صنعتوں کی بے پناہ صلاحیت کو اپنایا جائے۔ انہوں نے کہا کہ ہماری قومی صنعتوں میں شاندار استعداد موجود ہے — انہیں صرف اعتماد اور فروغ دینے کی ضرورت ہے۔ ’میرا برانڈ پاکستان ایکسپو‘ کا مقصد یہی ہے کہ ہر پاکستانی صنعت کار اور برانڈ کو عوام، خریداروں اور برآمدکنندگان کے سامنے اپنی مصنوعات پیش کرنے کا ایک مؤثر پلیٹ فارم فراہم کیا جائے۔

انہوں نے کہا کہ پاکستان کو اپنی ضروریات پوری کرنے کے لیے خود کفیل بننا ہوگا اور اس کے لیے قومی پیداوار پر فخر اور اس نوعیت کی نمائشوں میں بھرپور شرکت انتہائی ضروری ہے۔ پاکستان کی ترقی کی کنجی برآمدات کے فروغ میں ہے، اور یہ اسی صورت ممکن ہے جب پاکستانی مصنوعات کی عالمی سطح پر شناخت کو مضبوط بنایا جائے۔

انجینئر خالد عثمان نے اس ایونٹ کو معاشی خود انحصاری کی جانب ایک اہم قدم قرار دیا۔ انہوں نے کہا کہ اس نمائش میں خاص طور پر چھوٹے اور درمیانے درجے کے کاروباری اداروں کے لیے جگہ مختص کی گئی ہے۔ ان کا کہنا تھا کہ مقامی پیداوار کی ترقی کے بغیر معاشی استحکام ممکن نہیں۔