ملک گیر ہڑتال کا منصوبہ برقرار ہے،صدر کراچی چیمبر

کراچی چیمبر آف کامرس اینڈ انڈسٹری (کے سی سی آئی) کے صدر محمد جاوید بلوانی نے کہا ہے کہ ملک گیر شٹر ڈاؤن ہڑتال ہفتہ 19 جولائی کو اپنے طے شدہ شیڈول کے مطابق ہوگی، ہڑتال نہ تو ملتوی کی گئی ہے اور نہ ہی منسوخ۔

انہوں نے کہا کہ ملک گیر ہڑتال کا فیصلہ برقرار ہے اور اس پر پوری تیاری کے ساتھ عمل درآمد کیا جائے گا۔ انہوں نے واضح کیا کہ ہڑتال کی منسوخی یا التوا سے متعلق افواہیں پھیلانے والے عناصر کا اس ہڑتال سے کوئی تعلق نہیں۔

جاوید بلوانی نے کہا کہ ہڑتال کا فیصلہ چاروں صوبوں کے بڑے چیمبرز کی مشاورت سے کیا گیا ہے، اور اگر اسے ملتوی یا منسوخ کرنا ہوگا تو یہ فیصلہ بھی تمام چیمبرز سے مشاورت کے بعد ہی کیا جائے گا۔ انہوں نے کہا کہ اس حوالے سے کوئی بھی حتمی فیصلہ تمام شریک چیمبرز کی موجودگی میں مشترکہ پریس کانفرنس میں باضابطہ طور پر اعلان کیا جائے گا۔

انہوں نے کہا کہ افواہیں پھیلانے والے کاروباری برادری کے خیرخواہ نہیں بلکہ گمراہ کن عناصر ہیں۔ جاوید بلوانی نے تاجروں، دکانداروں، اور صنعتکاروں سے اپیل کی کہ وہ ہڑتال کی حمایت کریں، کیونکہ یہ معاملہ ملک اور قوم کے وسیع تر مفاد کا ہے۔

صدر کراچی چیمبر نے کہا کہ عوام اور کاروباری برادری کو افواہوں پر کان نہیں دھرنے چاہئیں، ہڑتال کی خبر درست اور حتمی ہے۔

جاوید بلوانی نے کہا کہ ملک گیر ہڑتال کا فیصلہ متفقہ مشاورت کا نتیجہ ہے، اور اسے سبوتاژ کرنے کی کوئی کوشش کامیاب نہیں ہوگی۔

کاپی رائٹ بزنس ریکارڈر، 2025