این ڈی ایم اے کا اربن فلڈنگ کے خدشے پر الرٹ جاری

نیشنل ڈیزاسٹر مینجمنٹ اتھارٹی (این ڈی ایم اے) نے اتوار کے روز پہاڑی علاقوں میں ممکنہ فلیش فلڈز اور بڑے شہروں میں اربن فلڈنگ کے خدشے کے پیش نظر احتیاطی تدابیر اپنانے کی ہدایت جاری کی ہے۔ یہ ہدایت 29 جون سے 5 جولائی 2025 تک متوقع شدید بارشوں کے تناظر میں جاری کی گئی ہے۔ این ڈی ایم اے نے متعلقہ حکام کو الرٹ رہنے اور عوام کو سرکاری ہدایات پر عمل کرنے کی تلقین کی ہے۔

نیشنل ایمرجنسیز آپریشن سینٹر (این ای او سی) نے ملک بھر کے مختلف علاقوں میں اتوار سے اگلے ہفتے تک متوقع بارشوں کے پیش نظر کئی موسمیاتی الرٹس جاری کیے ہیں، جن میں تیز ہواؤں اور گرج چمک کے ساتھ موسلا دھار بارش کی پیشگوئی شامل ہے۔

این ای او سی کے مطابق، 29 جون سے 3 جولائی تک کشمیر، شمال مشرقی پنجاب، پوٹھوہار ریجن، اسلام آباد، اور خیبر پختونخوا کے بالائی اور وسطی حصوں میں شدید بارشوں کی توقع ہے۔ ان بارشوں کے باعث خیبر پختونخوا کے نشیبی علاقوں، خصوصاً پشاور، چارسدہ، نوشہرہ، اور کوہاٹ میں شہری سیلاب کا خطرہ ہے۔

پوٹھوہار ریجن کے اضلاع جیسے اٹک، چکوال، راولپنڈی اور اسلام آباد میں بھی شہری سیلاب کا شدید امکان ظاہر کیا گیا ہے، خاص طور پر 29 جون کی رات 9 بجے سے صبح 4 بجے کے دوران۔

شمال مشرقی پنجاب کے کم بلندی والے اضلاع، مثلاً جہلم، منڈی بہاؤالدین، گجرات، سیالکوٹ، گوجرانوالہ، نارووال، اور لاہور میں بھی شدید بارشوں کے باعث ایمرجنسی کی صورتحال پیدا ہو سکتی ہے۔ اسی طرح فیصل آباد اور سرگودھا ڈویژنز میں بھی بارش کے باعث مقامی سیلاب اور ہنگامی صورتحال کا خدشہ ہے۔

این ای او سی نے خبردار کیا ہے کہ خیبر پختونخوا کے ہزارہ اور ملاکنڈ ڈویژنز، آزاد کشمیر کی وادی جہلم اور وادی پونچھ، اور شمال مشرقی پنجاب کی پیر پنجال پہاڑی سلسلے میں فلیش فلڈز کا امکان ہے۔ دریائے کابل میں نوشہرہ کے مقام پر نچلے درجے کے سیلاب اور اس کے معاون ندی نالوں میں پانی کی سطح میں اضافے کی پیش گوئی کی گئی ہے، جبکہ دریائے سوات میں درمیانے درجے کا بہاؤ متوقع ہے۔