سمیٹری گروپ نے پاکستان کا پہلا جنریٹو اے آئی کری ایٹو اسٹوڈیو لانچ کردیا

سِمیٹری گروپ لمیٹڈ نے پاکستان کا پہلا جنریٹو اے آئی تخلیقی(کری ایٹو) اسٹوڈیو باضابطہ طور پر لانچ کردیا ۔

کمپنی نے بدھ کو پاکستان اسٹاک ایکسچینج کو جاری ایک اعلامیے میں لکھا کہ افیئر اسٹوڈیو ڈاٹ اے آئی کا مقصد برانڈز کے تخلیقی انداز اور ذہانت پر مبنی کہانی گوئی کے ذریعے جڑنے کے طریقے کو نئی جہت دینا ہے۔

اس اسٹوڈیو سے توقع ہے کہ یہ پاکستان میں اشتہاری فلموں جیسے تخلیقی مواد کی تیاری کا انداز بدل کر رکھ دے گا، جبکہ اس کا آغاز سِمیٹری گروپ کی اے آئی پر مبنی تخلیقی سلوشن میں اسٹریٹجک توسیع کی عکاسی کرتا ہے — جو ڈیجیٹل تبدیلی اور برانڈ انگیجمنٹ میں جدت کی قیادت کے وژن سے ہم آہنگ ہے۔

گروپ نے مزید بتایا کہ وہ افیئر اسٹوڈیو ڈاٹ اے آئی میں 70 فیصد ایکویٹی حصص کا مالک ہے اور اس منصوبے کی اسٹریٹجک نگرانی بھی اس کے پاس ہے، جو کمپنی کی اے آئی پر مبنی ڈیجیٹل تجربات میں جدت اور ترقی کی وسیع تر حکمتِ عملی سے مطابقت رکھتی ہے۔

یہ منصوبہ اس بات کی عکاسی کرتا ہے کہ گروپ نئے دور کے تخلیقی ماڈلز متعارف کرانے کے لیے انسانی جذبات اور ذہین ٹیکنالوجی کو یکجا کرنے کے عزم پر کاربند ہے۔

سِمیٹری گروپ لمیٹڈ ایک نمایاں ڈیجیٹل ٹیکنالوجی اور ایکسپیرینسز کمپنی ہے، جو اہم کاروباری شعبوں کی ڈیجیٹلائزیشن اور تبدیلی میں مہارت رکھتی ہے۔ کمپنی کو ڈیجیٹل اسٹریٹجی، ٹرانسفارمیشن، مصنوعی ذہانت، ڈیجیٹل کامرس، ڈیٹا سائنس، موبیلٹی، ریٹیل/ریسرچ اور انٹرایکٹو مارکیٹنگ جیسے شعبوں میں خصوصی مہارت حاصل ہے۔