بحیرہ احمر اور خلیج میں بحری جہازوں پر حملے، دو پاکستانیوں سمیت تین افراد جاں بحق، رپورٹ

یمن کے حوثیوں نے منگل کو آبنائے باب المندب میں ایک چھوٹے کارگو جہاز پر حملہ کیا، جس کے نتیجے میں عملے کے تین ارکان ہلاک ہوگئے۔ یہ بات یمنی کوسٹ گارڈ کے دو ذرائع اور حکومت سے وابستہ دو فوجی حکام نے بتائی ہے۔

اگر ہلاکتوں کی تصدیق ہوجاتی ہے تو تنزانیہ کے پرچم بردار بحری جہاز ’’تیہامہ‘‘ پر ہونے والی یہ ہلاکتیں فروری کے آخر میں امریکا اور اسرائیل کے ایران پر حملوں سے مشرق وسطیٰ میں تنازع شروع ہونے کے بعد حوثیوں کی جانب سے کسی بحری جہاز پر کیے گئے حملے میں پہلی ہلاکتیں ہوں گی۔

حوثیوں نے تاحال اس حملے کی ذمہ داری قبول نہیں کی۔ تاہم، گزشتہ ماہ انہوں نے بحیرۂ احمر میں سعودی عرب کے خلاف بحری ناکہ بندی کا اعلان کیا تھا۔ حوثیوں کا کہنا تھا کہ یہ اقدام سعودی عرب کی جانب سے یمن کے محاصرے کے ردعمل میں کیا گیا ہے، تاہم ریاض نے یمن کا محاصرہ کرنے کی تردید کی ہے۔

برطانوی میری ٹائم ٹریڈ آپریشنز (یو کے ایم ٹی او) نے بتایا کہ اسے اطلاع ملی ہے کہ یمن کے ساحلی علاقے المخا کے قریب ایک کارگو جہاز نامعلوم چیز کی زد میں آ گیا، جس کے نتیجے میں جانی نقصان ہوا۔

برطانوی میری ٹائم سیکیورٹی کمپنی ایمبری کے مطابق اطلاعات ہیں کہ یمن کے جزیرے پریم سے 3.3 بحری میل شمال مشرق میں لنگر انداز جہاز کو حوثیوں نے نشانہ بنایا اور اسے نقصان پہنچایا، جس کے نتیجے میں عملے کے تین ارکان ہلاک ہوگئے۔

یمنی ذرائع نے بتایا کہ ہلاک ہونے والوں میں دو پاکستانی اور ایک انڈونیشی شہری شامل ہیں۔ جہاز عمان کے صلالہ سے جبوتی کی جانب روانہ تھا۔ حملے کے بعد عملے نے جہاز پر اپنا کنٹرول کھو دیا، جس کے بعد یمنی کوسٹ گارڈ کے اہلکار وہاں پہنچے۔

آبنائے باب المندب میں بحری جہازوں پر حملوں میں اضافے نے ان شپنگ کمپنیوں کے لیے غیر یقینی صورتحال مزید بڑھا دی ہے جو آبنائے ہرمز کی بندش کے باعث پہلے ہی مشکلات کا شکار ہیں۔

گزشتہ ہفتے اوسطاً روزانہ 32 بحری جہاز آبنائے باب المندب سے گزرے، جبکہ ناکہ بندی سے قبل اس آبنائے سے روزانہ اوسطاً 50 جہاز گزرتے تھے، کلیپر کے اعداد و شمار سے یہ بات سامنے آئی۔

ایمبری نے بتایا کہ حملے کے وقت یہ جہاز سعودی ملکیت میں نہیں تھا اور نہ ہی اسے سعودی کمپنی چلا رہی تھی۔ کمپنی کے مطابق جہاز ہفتے کے روز المخا سے روانہ ہوا تھا۔

ایل ایس ای جی کے ڈیٹا میں ’تیہامہ‘ کی مالک اور مینیجر کے طور پر درج مصری کمپنی نے مؤقف جاننے کے لیے بھیجی گئی ای میلز اور فون کالز کا جواب نہیں دیا۔